Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 122 Hüküm no: 95 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Yani’nin aldığı borcu ödediği halde rehin verdiği şalını iade etmediği iddiasıyla Hıristo v. Yanaki aleyhine açtığı davada iddiasını ispat edemediği Galata’da mütemekkin Yorgi v. Yani nâm zimmî Galata Bâb Mahkemesi’nde meclis-i şer‘de Hıristo v. Yanaki nâm zimmî muvâcehesinde ben bundan akdem mersûm Hıristo zimmî yedinden ve mâlından iktirâz ve kabz eylediğim on beş guruş deynim mukābelesinde mâlım olan yirmi beş guruş kıymetli bir hilâlî şalımı irhân ve teslîm etmişidim hâlâ deynim olan meblağ-ı mezkûr on beş guruşu yedimden ahz birle şal-ı mezkûru bana teslîme mersûm Hıristo zimmîye tenbîh olunmak matlûbumdur deyü da‘vâ eyledikde ol dahi ber-vech-i muharrer cihet-i mezkûreden on beş guruş alacak hakkı olduğunu ikrâr ve şal-ı mezkûru külliyyen ba‘de’l-inkâr müdde‘î-i mersûm Yorgi zimmî ber-vech-i muharrer müdde‘âsını isbâta kādir olmayıp bi’t-taleb mersûm Hıristo zimmî ba‘de’t-tahlîfü’ş-şer‘î mûcebince müdde‘î-i mersûm Yorgi zimmî şal-ı mezkûr da‘vâsıyla bilâ-beyyine mu‘ârazadan ba‘de’l-men‘ ikrârıyla lâzım gelen meblağ-ı mezkûr on beş guruşu mersûm Hıristo zimmîye edâsıyla mersûm Yorgi zimmî ilzâm olunduğu huzûr-ı âlîlerine i‘lâm olundu. Fî 29 sene [1]221.