Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 123 Hüküm no: 96 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Beşir’in beş yüz guruş alacağı olduğu iddiasıyla Hadice Hatun aleyhine açtığı davasında yüz guruşa sulh olup zimmetini ibra ettiği Mahmiye-i İstanbul’da Kumrulu Mescid kurbünde sâkine sâhibe-i arzuhâl mu‘arrefetü’z-zât Emine bt. Beşir nâm hatun Galata’da mahfil-i kazâda derûn-ı arzuhâlde mezkûretü’l-ism Hadice Hatun bt. el-Hâc Ahmed b. Abdurrahman’ın zevci tarafından husûs-ı âtîde vekîl olduğu zâtını ârifân Hüseyin Beşe b. Hasan ve Yahya Beşe b. Mehmed şehâdetleriyle sâbit olan Hammâmî Mehmed Ağa b. el-Hâc İbrahim muvâcehesinde müvekkile-i mezbûre Hadice Hatun zimmetinde cihet-i karzdan beş yüz guruş alacak hakkım olmağla hâlâ taleb ederim deyü ba‘de’d-da‘vâ ve’l-inkâr müdde‘iye-i mezbûre Emine Hatun ber-vech-i muharrer müdde‘âsına ikāmet-i beyyine edemeyip müvekkile-i mezbûreyi istihlâf için bi’t-taleb kıbel-i şer‘den mürseli Kâtib Hâfız Mustafa Tevfik Efendi dâ‘îlerinin medîne-i Üsküdar’a tâbi‘ Kanlıcak karyesinde müvekkile-i mezbûrenin sâkine olduğu sâhilhânesinde akdeylediği meclis-i şer‘de mezbûre Hadice Hatun’u vech-i şer‘î üzere tahlîf esnâsında iken beynlerine muslihûn tavassut edip müvekkile-i mezbûre def‘an li’n-nizâ‘ ve fedâen li’l-yemîn mâlından müdde‘iye-i mezbûre Emine Hatun’a yüz guruş def‘ u teslîm ve mütâlebesine müte‘allika da‘vâdan mezbûrenin zimmetini kabûlü hâvî ibrâ ve iskāt eyledikde ol dahi ba‘de’l-kabz mâ‘adâ dört yüz guruş mütâlebesine ve hukūk-ı sâire-i şer‘iyyeye müte‘allika âmme-i da‘vâdan mezbûre Hadice Hatun’un zimmetini ibrâ-i âm ile ibrâ ve iskāt eyledikde ol dahi ber-minvâl-i muharrer ibrâ-i mezkûrunu kabûl-birle külliyyen kat‘-ı münâza‘a eylediklerini mezbûr dâ‘îleri mahallinde tahrîr ve meclis-i şer‘a inhâ eylediği ba‘de’t-tescîl mübâşiri Hâfız Çavuş kulları yediyle huzûr-ı âlîlerine i‘lâm olundu. Fî 2 şehr-i Rebî‘ülevvel sene [1]221.