Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 124 Hüküm no: 98 Orijinal metin no: [8b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abacı Vasil’in Hububat Nazırı Hacı Mustafa Efendi’den alacağını tahsil eden vekili Kampano v. Dimitri’den beş yüz otuz guruş alacağı olduğu Galata ahâlîsinden arzuhâl eden Abacı Vasil v. Nikola zimmî Galata Bâb Mahkemesi’nde meclis-i şer‘[de] Kampano v. Dimitri zimmî muvâcehesinde hâlâ hubûbât nâzırı hâcegân-ı Dîvân-ı hümâyûn’dan el-Hâc Mustafa Efendi yedinden navl-ı sefîneden alacağım olan beş yüz otuz guruş nâzır-ı mûmâ-ileyhden ahz u kabzına mersûm Kampano zimmî meblağ-ı merkūmu kabza vekîlim deyü nâzır-ı mûmâ-ileyhden taleb eyledikde nâzır-ı mûmâ-ileyh dahi zimmî-i mersûmu tasdîk ve meblağ-ı merkūmu mersûm Kampano zimmîye teslîm edip ol dahi kabz ve hâlâ yedinde mevcûd olmağla hattâ ber-vech-i muharrer ahz u kabzını ve hâlâ yedinde mevcûd olduğunu bana inhâ ve ikrâr eyledikde ben dahi zimmî-i mersûmun kabzını mücîz olmamla ber-vech-i meşrûh makbûzu olan meblağ-ı merkūmu zimmî-i mersûmdan hâlâ taleb ederim deyü da‘vâ eyledikde ol dahi cevâbında külliyyen ba‘de’l-inkâr müdde‘î-i mersûm Vasil zimmî ber-vech-i muharrer müdde‘âsını lede’t-tezkiye şehâdetleri makbûle olan Tophane’de Karabaş Mustafa Ağa Mahallesi’nde sâkin İbrahim Beşe b. İbrahim, Galata Batpazarı’nda mütemekkin Abacı Ligor v. Kostantin şehâdetleriyle mersûm Kampano zimmî muvâcehesinde vech-i şer‘î üzere isbât etmeğin mûcebince meblağ-ı merkūm beş yüz otuz guruşu müdde‘î-i mersûm Vasil zimmîye edâya mersûm Kampano zimmîye tenbîh olunduğu bi’l-iltimâs [huzûr-ı âlîlerine i‘lâm olundu.] Fî 6 Ra sene [1]221.