Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 125 Hüküm no: 100 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bıçakçı Mehmed Beşe’nin evinin bodrumuna gömdüğü ve karısı Nefîse bt. Mustafa tarafından haksız yere alınan altınlarının kendisine iadesi Bıçakçı esnâfından Mehmed Beşe b. Mehmed Salih Galata Bâb Mahkemesi’nde meclis-i şer‘de zevce-i medhûlün-bihâsı mu‘arrefetü’z-zât Nefîse bt. Mustafa nâm hatun muvâcehesinde kasaba-i Tophane’de İlyas Çelebi Mahallesi’nde vâki‘ zevcem mezbûre ile bi’l-ma‘iyye sâkin olduğumuz menzilin bodrumu derûnunda zîr-i hâke vaz‘ ve defn eylediğim mecmû‘u bin yüz yetmiş guruşluk ma‘lûmü’l-aded altınlarımı zevcem mezbûre târih-i i‘lâmdan bir ay mukaddem bi-gayr-ı hak ahz edip hattâ târih-i i‘lâm günü menzil-i merkūm derûnunda mahzar-ı şuhûdda mezbûre Nefîse Hatun ikrâr ve işhâd dahi etmekle istirdâd ederim deyü ba‘de’d-da‘vâ ve’s-suâl ol dahi cevâbında külliyyen ba‘de’l-inkâr müdde‘î-i mezbûr Mehmed Beşe ber-vech-i muharrer ikrâr müdde‘âsını lede’t-tezkiye şehâdetleri makbûle olan kasaba-i Fındıklı’da Selime Hatun Mahallesi sükkânından Berber es-Seyyid Mustafa b. Ahmed ve Müezzin İsmail Efendi b. Mehmed nâm kimesneler şehâdetleriyle mezbûre Nefîse Hatun muvâcehesinde isbât etmeğin mûcebince meblağ-ı merkūm bin yüz yetmiş guruşluk altını müdde‘î-i mezbûra redd ü teslîme mezbûre Nefîse Hatun’a tenbîh olunduğu bi’l-iltimâs [huzûr-ı âlîlerine i‘lâm olundu.] Fî 3 Ra sene [1]221.