Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 823 Hüküm no: 1073 Orijinal metin no: [128b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahudi Asya bt. Bahram’ın, elçi Delahay Vanteli v. Delahay’a sattığı câriye bahasından alacaklı olduğu iddiasını ispat edemediği Mahmiye-i İstanbul’da Balatkapısı dâhilinde sâkine Asya bt. Bahram nâm Yahudiye dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i âlîde bi’l-fi‘l Ceneviz elçisi olan bâ‘isü’s-sifr Delahay Vanteli v. Delahay tarafından husûs-ı âti’l-beyâna vekîli olduğu bimâ hüve nehcü’s-sübût şer‘an sâbit olan Toma v. Yorgi nâm tercümân muvâcehesinde üzerine da‘vâ ve takrîr-i kelâm edip târih-i kitâbdan iki sene mukaddem evsâfı beynimizde ma‘lûme Zorika nâm câriyemi iki yüz otuz esedî guruşa mezbûr Toma’ya bey‘ ve teslîm edip ol dahi müvekkil-i mezbûr Delahay Vanteli için iştirâ ve tesellüm ettiğinden sonra semen-i mezbûrdan otuz esedî guruşunu yedinden ahz u kabz edip bâkī iki yüz guruşu müvekkil-i mezbûr zimmetinde kalmış idi suâl olunup alıverilmek matlûbumdur dedikde gıbbe’s-suâl mezbûr Toma cevâbında câriye-i mezbûreyi müdde‘iyye-i mezbûreden vech-i mübeyyen üzre müvekkilem için semen-i mezbûra iştirâ ve kabz ettikden sonra câriye-i mezbûre bikr olmamak ile müdde‘iyye-i mezbûre Asya’ya teslîm ol dahi kabz ve tesellüm ve vech-i muharrer üzre makbûzu olan otuz esedî guruşu kırk güne değin te’cîl edip ol dahi kabûl etmişidi deyû def‘le mukābele edicek gıbbe’s-suâl ve’l-inkâr mezbûr Toma’dan def‘-i mezbûru mübeyyine beyyine taleb olundukda tâife-i Yahûd’un Kordava cemâ‘atinden Avraham v. David ve Zeytun cemâ‘atinden Benamin v. Murdehay nâm Yahudiler li ecli’ş-şehâde meclis-i şer‘-i şerîfe hâzırân olup istişhâd olunduklarında fi’l-hakīka müdde‘iyye-i mezbûre câriye-i mezbûreyi mezbûr Toma’ya semen-i mezbûr iki yüz on esedî guruşa bey‘ ve teslîm edip semeninden otuz guruşunu ahz u kabz ettiğinden sonra merkūm Toma ile fesh-i bey‘ ve ikāle edip mezbûr Toma câriye-i mezbûreyi müdde‘iyye-i mezbûre Asya’ya teslîm [ve] müdde‘iyye-i mezbûre Asya dahi kabz ve tesellüm ettiğinden sonra semeninden makbûzu olan otuz esedî guruşu kırk güne değin te’cîl edip ol dahi kabûl etmiş idi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘î-i mezbûra vech-i muharrer üzre mu‘ârazadan men‘ olunmağın mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Umdetü’l-emâcid ve’l-ekârim Çavuşbaşı İsmail Ağa, umdetü erbâbi’t-tahrîr ve’l-kalem Bekir Efendi Tezkireci-i evvel, mefharü erbâbi’t-tahrîr ve’l-kalem Mustafa Efendi, umdetü’l-a‘yân Eyüb Ağa, Hasan Beşe b. ( ) Çukadâr. Derkenâr: Kâtib sehv etmekle bunun altında olan sicile sahîh kayd olunmuşdur. (Mühür)