Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 129 Hüküm no: 110 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasbî İbrahim Çelebi Vakfı’na ait menzilin tahliye edilerek mütevelliyesi Emine Hatun’a teslimine, buna karşılık diğer küçük bir menzil ile arsa hissesinin Emine Hatun tarafından Ayşe Hatun’a devrine ve altı yüz guruş nakit para verilmesine karar verildiği Derûn-ı arzuhâlde mezkûretü’l-ism Emine Hatun bt. Narin el-Hâc Mehmed b. Hasan’ın oğlu ve tarafından husûs-ı âtîde vekîl olduğu zât-ı mezbûreyi bi’l-mu‘arrefeti’ş-şer‘iyye ârifân Ömer Efendi b. el-Hâc Ahmed ve Mehmed Beşe b. İbrahim şehâdetleriyle zâhir olan es-Seyyid Mehmed Kadri Çelebi b. es-Seyyid el-Hâc Ömer Çarşamba günü Arz Odası’nda huzûr-ı ma‘delet-âsafîde ma‘kūd meclis-i şer‘-i münîrde müvekkile-i mezbûrenin üvey vâlidesi sâhibe-i arzuhâl mu‘arrefetü’z-zât Âişe bt. el-Hâc Ahmed nâm hatun muvâcehesinde bin yüz kırk dört senesi Zi’l-hiccesi’nin ikinci günü tarihiyle müverraha ve ol tarihde kasaba-i Tophane’de nâibü’ş-şer‘i’l-kavîm olan Lütfullah Efendi’nin imzâsını havîye işbu yedimde olan bir kıt‘a vakfiye sûretinin hâmişinde tastîr ve tebyîn olunduğu üzere kasaba-i mezbûre mahallâtından el-Hâc Memi Mahallesi’nde kâin el-yevm etrâf-ı erba‘adan Arayıcı es-Seyyid Mehmed Salih menzili mezbûre Âişe Hatun menzili ve Yemci el-Hâc Mustafa ve şerîki Halil Ağa menzili ve tarîk-i âm ile mahdûd müştemilât-ı mevcûde-i ma‘lûmeyi hâvî bir bâb menzil mahalle-i mezbûre ahâlîsinden Hasbî İbrahim Çelebi b. Yusuf b. Ramazan’ın yedinde mülkü iken vakf-ı sahîh-i müebbed ve habs-i sarîh-i muhalled ile vakfedip şöyle şart eyledi ki hayâtda oldukça menzil-i merkūmun dâhiliye ve hâriciyesinde kendi sâkin ve mutasarrıf ola vefâtından sonra evlâdı ve evlâd-ı evlâdı ve ba‘dehum mu‘tak ve mu‘takaları ve evlâd-ı evlâd-ı evlâdları sâkin ve mutasarrıf olalar ve ba‘de’l-inkırâz hizmetkârları Ahmed b. Abdullah ile Mehmed b. Hüseyin sâkin ve mutasarrıf olalar ve ba‘dehümâ evlâd-ı evlâdları ve evlâd-ı evlâdları zükûr ve inâsı ale’s-seviyye sâkin ve mutasarrıf ve mütevellîsi dahi ale’t-tertîb ola ve ba‘de’l-inkırâzı’l-kül mârru’z--zikr el-Hâc Memi Mahallesi imâmı mütevellî olup menzil-i mezkûr icâre-i müeccele-i misliyye ve yevmî bir akçe icâre-i müeccele ve yed-i mütevellî ile îcâr olunup bi’l-akçe icâre-i müeccele-i mezkûreye mütevellî-i mezbûr mutasarrıf olup ve icâre-i mu‘accele-i ma‘lûme ile kifâyet mikdârı yed-i mütevellî ile revgan-ı zeyt iştirâ olunup Dergâh-ı âlî dâme mahfûfen bi’l-me‘âlî yeniçerilerinin otuz sekiz bölüğe mahsûs oda derûnunda medfûn kabir üzerinde leyâlîde bir kandil îkād olunup îkād eden kimesneye dahi yevmî bir akçe vazîfe verile deyü târih-i mezkûrda cânib-i şerî‘at-i garrâdan me’zûnen bi’l-hükm mürsel Mevlânâ Abdullah Efendi b. el-Hâc Hüseyin’in menzil-i mezkûrda huzûr-ı Müslimînde akdeylediği meclis-i şer‘de li-ecli’t-tescîl mütevellî nasbeylediği Hüseyin Çelebi b. el-Hâc Eyüb mahzarında ta‘yîn-i şürût ve tebyîn-i kuyûd eyledikden sonra lede’l-muhâsama ve’l-muhâkeme tescîl-i şer‘î edip ber-vech-i meşrûh meşrûtun-lehümden vâlidem müvekkile-i mezbûre Emine Hatun vâkıf-ı mezbûrun hizmetkârı mezbûr Mehmed b. Hüseyin’in sulbiye kebîre kızı olmağla süknâ ve nevbet-i tasarruf ber-mûceb-i şart-ı vâkıf vâlidem müvekkile-i mezbûreye gelmişken üvey vâlidesi mezbûre Âişe Hatun menzil-i mezkûrda müstakilleten sâkine olup fuzûlen zabt u tasarruf etmekle kasr-ı yed-birle tahliye ve müvekkilem mezbûre için hâliyeten bana teslîme mezbûre Âişe Hatun’a tenbîh olunmak matlûbumdur deyü bi’l-vekâle ba‘de’d-da‘vâ ve’s-suâl mezbûre Âişe Hatun dahi cevâbında menzil-i mahdûd-ı mezkûr üvey kızım müvekkile-i mezbûre Emine Hatun’un babası zevcim mezbûr Narin el-Hâc Mehmed’in yedinde şirâen mülkü iken vefât eyledikde bana ve benden mütevellid evlâd-ı kibârı Osman ve Ebûbekir ve Ümmügülsüm ve üvey kızı müvekkile-i mezbûreye mevrûs olup kable’l-kısme evlâdlarım mezbûrûn Osman ve Ebûbekir ve Ümmügülsüm müte‘âkiben fevt olmalarıyla menzil-i mezkûr benimle üvey kızım müvekkile-i mezbûra bi-tarîkı’l-münâsaha mevrûs olup ancak hisse-i irsiyye-i ma‘lûmemi bi-hakkın tasarruf ederim deyü menzil-i mezkûra vaz‘-ı yedini ikrâr ve müdde‘î-i vekîl-i mezbûrun ber-vech-i meşrûh müdde‘âsını ve mazmûn-ı vakfiye-i mezkûreyi külliyyen inkâr etmekle müdde‘î-i vekîl-i mezbûr ber-vech-i meşrûh müdde‘âsını vech-i şer‘î üzere beyâna havâle olundukda isbât esnâsında beynlerine muslihûn tavassut edip ser-mi‘mârân-ı hâssa kullarının imzâ ve hatemini hâvî bir kıt‘a keşif defteri mantûkunca mezbûre Âişe Hatun’un mülkü olmak zu‘muyla menzil-i mezkûrun ta‘mîr ve tecdîdine mâlından masrûfu olmak üzere iddi‘â eylediği üç bin altı yüz elli üç buçuk guruş iki akçeye mahsûben Kerime Hatun Vakfı’ndan imâm meşrûtası olup menzil-i mezkûr civârında kâin ma‘lûmü’l-hudûd ve’l-müştemilât bir bâb âhar sagīr menzilin dört sehm i‘tibârıyla müvekkile-i mezbûrenin mutasarrıfe olduğu bir sehm hisse-i şâyi‘asını ve Topçubaşı İsmail Ağa’nın Mekteb-i şerîf Vakfı’ndan olup mahâll-i mezkûrda kâin ma‘lûmü’l-hudûd bir bâb sagīr muhterik menzil arsasının kezâlik dört sehm i‘tibârıyla müeccele-i mezbûrenin mutasarrıfe olduğu bir sehm hisse-i şâyi‘asını mütevellîleri re’yiyle mezbûre Âişe Hatun’a ferağa ve nakden dahi altı yüz guruş vermeğe vekîl-i müdde‘î-i mezbûr es-Seyyid Mehmed Kadri Çelebi bi’l-vekâle ta‘ahhüd eyledikde mezbûre Âişe Hatun dahi râziye ve ber-vech-i meşrûh menzil-i mezkûrun vakfiyesini mukırre ve mazmûn-ı vakfiyeyi dahi mu‘terife olmağın mûcebince menzil-i mevkūf-ı mezkûru mezbûre Âişe Hatun’un tahliye ve üvey kızı müvekkile-i mezbûre Emine Hatun için oğlu vekîl-i mezbûra teslîme üvey vâlidesi mezbûre Âişe Hatun’a ve mârru’z--zikr müvekkile-i mezbûre Emine Hatun’un mutasarrıfe olduğu sagīr menzil ile arsa-yı merkūmeden olan i‘tibâr-ı mezkûr üzere bir sehm hisse-i şâyi‘alarını bâ-re’y-i mütevellî mezbûre Âişe Hatun’a ferağa ve meblağ-ı merkūm altı yüz guruşu dahi edâ ve teslîme müvekkile-i mezbûreye izâfetle oğlu vekîl-i merkūm es-Seyyid Mehmed Kadri Çelebi’den herbirine tenbîh olunduğu mahrûse-i Galata Mahkemesi’nde tescîl ve mübâşirleri Süleyman Çavuş yediyle huzûr-ı âlîlerine i‘lâm şüd. Fî 4 Ra sene [1]221.