Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 131 Hüküm no: 111 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aksabet bt. Bedros’un mahzeninin kiracısı Korfulu Diyo’nun ölmesi üzerine aralarındaki kira sözleşmesinin fesh olunduğu Galata hâricinde Beyoğlu ahâlîsinden sâhibe-i arzuhâl Aksabet bt. Bedros v. Karabet nâm Ermeniye tarafından ber-vech-i âtî vekîl-i müseccel-i şer‘îsi Aci Ligor v. Yorgi nâm zimmî Galata Bâb Mahkemesi’nde meclis-i şer‘-i kavîmde mârrü’l-beyân Beyoğlu’nda mütemekkin iken bundan akdem hâlik olan Korfulu Diyo v. Seyos’un verâseti zevce-i metrûkesi Lolo Nasrâniye ile sulbiye sagīre kızı Todoriye’ye inhisârı tahakkukundan sonra zevce-i mersûmenin babası ve tarafından husûs-ı âti’z-zikrde sâbitü’l-vekâle vekîli çukacı esnâfından Sakızlı Mike v. Dimitri nâm zimmî ve sagīre-i mersûmenin vasîsi Korfulu Nikola v. Perestiyan muvâcehelerinde Korfu Tercümânı Nadon tarafından mürsel Kapıoğlanı Petro ve Yasakçı İbrahim hâzır oldukları hâlde Galata’da Havyar Hanı derûnunda Fransız Vican odası ve Saçlıoğlu Ohannes dükkânı beyninde kâin bir bâb kârgîr mahzen müvekkilem mersûme Aksabet Nasrâniye’nin taht-ı icâresinde derûnunda mevcûde gedik tâ‘bir olunan âlât-ı lâzıme ve eşyâ-i ma‘lûme bâ-hüccet-i şer‘iyye yedinde mülkü olmağla Nasrâniye-i mersûme mahzen-i merkūmu âlât-ı lâzımesiyle ma‘an senede beş yüz elli guruş ücret tesmiyesiyle hâlik-i mersûma sağlığında Ermeniyyü’l-ibâre bir kıt‘a temessük ile îcâr ve bir senelik ücreti olan meblağ-ı merkūm beş yüz elli guruşu ber-vech-i peşin mâlik-i mersûmun yedinden ahz ve mahzen-i merkūmu âlât-ı lâzımesiyle teslîm eyledikde ol dahi [mahzen-i] merkūma duhûl ve vakt-i duhûlünden altı ay altı gün mürûrunda hâlik olduğuna binâen beynlerinde mün‘akid olan îcâr şer‘an münfesih ve ücret-i mezkûre beş yüz elli guruşun iki yüz dokuz buçuk guruşu mütemekkin olduğu müddetin ücretine mahsûben ba‘de’t-tenzîl mâ‘adâ iki yüz yetmiş buçuk guruşu zevce-i mersûme ile sagīre-i merkūmeye mevrûs olmuş iken zevce-i mersûme ile vasiyy-i mersûm mahzen-i merkūmu bi-gayr-ı vech-i şer‘î el-ân zabt etmekle suâl olunup müvekkilem mersûmenin hâlik-i mersûmdan me’hûzu olan ücret-i mezkûreden bâkī meblağ-ı merkūmu müvekkilem mersûma mâlından ahz ve mahzen-i merkūmu âlât-ı lâzımesiyle müvekkilem mersûmeye teslîme bi’l-asâle ve bi’l-izâfe mersûmân Mike ve Nikola’ya tenbîh olunmak bi’l-vekâle matlûbumdur deyü da‘vâ ettikde onlar dahi cevâblarında ber-vech-i muharrer ikrâr u i‘tirâf etmeleriyle mûcebince îcâr-ı merkūm müstecir-i mersûmun helâkiyle şer‘an fesh olmağla meblağ-ı bâkī-i merkūmu vesâyeten ve vekâleten kabz ve mahzen-i merkūmu âlat-ı lâzımesiyle müvekkilem mersûmeye teslîme mersûmân Mike ve Nikola’ya tenbîh olunduğu Çukadâr Mehmed kulları yediyle huzûr-ı âlîlerine i‘lâm olundu. Fî 5 Ra sene [1]221.