Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 132 Hüküm no: 112 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihal v. Nikolo ve karısı İstemati’nin bazı mücevher, eşya ve paralarını çaldıkları iddiasıyla Korfulu Vesimo ve Angeli aleyhine açtıkları davada iddialarını ispat edemedikleri Galata hâricinde Ketehorya nâm mahalde mütemekkin arzuhâl eden Mihal v. Nikolo ve zevcesi şahsı mu‘arrefe İstemati bt. Nikola nâm Nasrâniye Galata’da mahfil-i kazâda Korfulu Vesimo v. Dimitri ve Angeli v. Anaştaş muvâcehelerinde Korfu tercümânı tarafından Kapıoğlanı Petro hâzır olduğu hâlde târih-i i‘lâmdan iki ay mukaddem Salı günü fecir vakti sa‘at sekizde bir kilisede icrâ-yı âyîn-i bâtıla kaydında iken mersûmân Vesimo ve Angeli mahâll-i merkūmda kâin menzilimiz kapısını bir takrîb küşâd ve mersûm Angeli tecessüs ve i‘ânet için menzil-i mezkûr kapısı hâricinde bekleyip ve merkūm Vesimo menzil-i mezkûra duhûl edip mukaffel odanın ve oda-i merkūm derûnunda mevcûd mukaffel sandığın kilidlerini şikest ve sandık-ı merkūm derûnunda mahfûz mecmû‘u bin beş yüz guruş kıymetli bizim mâlımızdan yirmi miskāl bir çift altın bilezik ve iki başlı bir çift altın kuşak ve bir altın yüzük ve bir sim kutu ve bir sim hamâyili ve bir ipek ile işbu hâzıra bi’l-meclis mu‘arrefetü’ş-şahs Katerina bt. Apostol Nasrâniye’nin mâlı olup bi-tarîkı’l-emâne bize def‘ u teslîm biz dahi tesellüm ve kabz ve zikrolunan sandığa vaz‘ ve hıfz eylediğimiz elli iki aded İstanbul mahbûbu ve on beş yalnız altını ve otuz üç Macar altını ve iki kramise tâ‘bir olunur altın ve yirmi dokuz zer-i mahbûb nısfiyyesi ve yüz iki İstanbul mahbûbu rub‘iyyesi ve beş İstanbul fındık ve kırk beş fındık rub‘iyyesi ve yirmi sekiz guruş rub‘iyyesi ve yine sandık-ı merkūm derûnunda mahfûz emânetlerden gāibât ani’l-meclis Sofya Nasrâniye’nin mâlı olan bir sim tabak ve yedi sim fincan zarfı ve bir altın kuşak ve bir altın yüzük ve diğer Katerina Nasrâniye’nin mâlı olan kezâlik bir sim tabak ve altı fincan zarfı ve Elenko Nasrâniye’nin mâlı olan bir sim kuşak ve Saltana Nasrâniye’nin mâlı olan bir çift zümrüd küpe taleb ederim deyü zevcân-ı merkūmân ve hâzıra-i mersûmeden herbiri da‘vâ eylediklerinde Kapıoğlanı mesfûr Petro vesâtetiyle ba‘de’l-istintak onlar dahi cevâbında külliyyen ba‘de’l-inkâr müdde‘ûn-ı mersûmûn ber-vech-i meşrûh müdde‘âlarına ikāmet-i beyyineden izhâr-ı acz edip tâlib-i tahlîf dahi olmamağın mûcebince müdde‘ûn-ı zevcân-ı mersûmân Mihal ve İstemati ve hâzıra-i mersûme Katerina da‘vâ-yı mezkûreleriyle Korfulu merkūmân Vesimo ve Angeli Nasrânîlere bilâ-beyyine mu‘ârazadan men‘ olundukları tescîl ve bi’l-iltimâs huzûr-ı adâlet-âsafânelerine i‘lâm olundu. Fî 9 Rebî‘ülevvel sene [1]221.