Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 134 Hüküm no: 117 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atlascı İstefan’ın üç bin yüz guruş alacağı olduğu iddiasıyla Askerîoğlu Yoseb aleyhine açtığı davada bin altı yüz guruşa sulh olduğu Tahakkuk-ı özr-i şer‘îye binâen husûs-ı âti’z-zikri mahallinde istimâ‘ ve fasl [ü] hasm için bi’t-taleb cânib-i şerî‘at-i garrâdan me’zûnen bi’l-hükm mürsel Vekāyi‘ Kâtibi Şerîf Mehmed Emin Efendi dâ‘îleri mahrûse-i Galata’da Sultan Bayezid Mahallesi’nde kâin Atlascı İstefan zimmînin menziline varıp huzûr-ı Müslimînde akd-i meclis-i şer‘-i âlî eyledikde mesfûr İstefan v. Bezzâz Sahak meclis-i ma‘kūd-ı mezkûrda Askerîoğlu Yoseb v. Andon zimmî muvâcehesinde işbu târih-i i‘lâmdan on iki sene mukaddem mersûm Yoseb zimmîye mâlımdan ikrâz ve teslîm eylediğim üç bin yüz guruş zimmetinde alacak hakkım olmağla hâlâ taleb ederim deyü da‘vâ eylediğimde ol dahi ber-vech-i muharrer ikrâr edip lâkin târih-i mezkûrdan beri sana bilâ-devr-i şer‘î ribâ nâmıyla bâ-defter-i müfredât ceste ceste üç bin iki yüz elli guruş mâlımdan medfû‘um olmağla meblağ-ı mezkûrun üç bin yüz guruşu deynime mahsûben fürûnihâde kılınıp bâkī yüz elli guruşu taleb ederim deyü benden da‘vâya tasaddî-birle beynimizde ba‘de vukū‘ı’l-münâza‘a ve bâ-vesâtet-i muslihîn beni da‘vâ-yı mezkûremden mersûm Yoseb zimmî ile bin altı yüz guruş üzerine inşâ-i akd-i sulh eylediklerinde ol dahi sulh-ı mezkûru ba‘de’l-kabûl ben mâ‘adâ bin beş yüz guruşa müte‘allika da‘vâdan mersûm Yoseb zimmînin zimmetini ibrâ ve iskāt ol dahi bilâ-devr-i şer‘î ribâ nâmıyla benden iddi‘â eylediği üç bin iki yüz elli guruşa müte‘allika da‘vâdan kezâlik benim zimmetimi ibrâ ve iskāt ve herbirimiz ber-vech-i muharrer âharın ibrâsını ba‘de’l-kabûl bedel-i sulh-ı mezkûrdan mersûm Yoseb zimmî zimmetinde alacağım meblağ-ı merkūm bin altı yüz guruşun bin guruşunu mi‘mâr hizmetkârlarından işbu hâzır bi’l-meclis Andon v. İsayi zimmîye cihet-i karzdan deynim olan bin guruşa mahsûben havâle-i makbûle-i sahîha-i şer‘iyye ile havâle eylediğimde onlar dahi havâle-i mezkûreyi kabûl edip bu vechile hâzır-ı mersûm Andon zimmîye deynim olan bin guruşdan zimmetim berî olmuşdur ve mersûm Yoseb zimmî zimmetinde bedel-i sulh-ı merkūmdan altı yüz guruş alacak hakkım bâkī kalmışdır deyü müdde‘î-i mukırr-ı mersûm İstefan zimmîyi bi’l-cümle kelimât-ı meşrûhasında hâzır-ı mesfûr Andon zimmî ile mersûm Yoseb zimmîden herbiri ba‘de’t-tasdîk ve mersûm Yoseb zimmî ibrâdan müstesnâ bedel-i sulh-ı merkūm bin altı yüz guruş ber-vech-i tafsîl hâzır-ı mersûm Andon zimmî ile mesfûr İstefan zimmîye deyni olduğunu tâyi‘an ve kat‘iyyen ikrâr u i‘tirâf etmeğin alâ-mûcibi ikrârihi bedel-i sulh-ı merkūm bin altı yüz guruşun bin guruşunu bi-tarîkı’l-havâle hâzır-ı mersûm Andon zimmîye ve bâkī altı yüz guruşunu müdde‘î-i mesfûr İstefan zimmîye edâsıyla mesfûr Yoseb zimmîyi ilzâm eylediğini kâtib-i mezbûr mahallinde tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ eylediği ba‘de’t-tenfîz ve’t-tescîl bi’l-iltimâs Galata Mahkemesi’nden huzûr-ı âlîlerine i‘lâm olundu. Fî-gurreti Ra sene [1]221.