Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 136 Hüküm no: 119 Orijinal metin no: [10b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bezzâz Sirab ve ortağı Sahak’ın Mıgırdıç’tan alacaklarına kefaletinden dolayı kardeşi Avanis’den üç yüz kırk beş guruş alacakları olduğu Mahrûse-i Galata dâhilinde Sultan Bayezid Mahallesi ahâlîsinden Bezzâz Sirab v. Sirab ve şerîki arzuhâl eden Sahak v. Parsih zimmîler bi’t-terâzî mahrûse-i mezbûre mahkemesinde meclis-i kavîmde yine mahrûse-i mezbûre ahâlîsinden Avanis v. Simyon zimmî muvâcehesinde mersûm Avanis’in li-ebeveyn er karındaşı işbu hâzır bi’l-meclis Mıgırdıç zimmî zimmetinde nev‘ ve fiyatı ve zirâ‘ı ma‘lûm akmişe semeninden memhûr temessük mantûkunca alacak hakkımız olan beş yüz on guruşun edâsına bi’l-emr ve’l-kabûl mersûm Avanis zimmî kefîl ve zâmin oldukdan sonra yüz altmış beş guruşunu asîl ve kefîl yedlerinden ba‘de’l-ahz bâkī kalan üç yüz kırk beş guruşu kefâletine binâen mersûm Avanis zimmîden hâlâ taleb ederim deyü ba‘de’d-da‘vâ ve’l-istintak mersûm Avanis zimmî dahi cevâbında husûs-ı merkūmu ber-vech-i tafsîl tâyi‘an ve kat‘iyyen ikrâr u i‘tirâf edip lâkin meblağ-ı bâkī-i merkūmun seksen guruşunu dahi müdde‘iyân-ı mersûmâna teslîm etmişidim deyü eylediği def‘ine ikāmet-i beyyineye kādir ve tahlîfe tâlib olmamağın mûcebince meblağ-ı bâkī-i merkūm üç yüz kırk beş guruşun müdde‘iyân-ı mersûmâna kefâletine binâen edâ ve teslîme mersûm Avanis’e tenbîh olunduğu huzûr-ı âlîlerine i‘lâm olundu. Fî 16 Ra sene [1]221.