Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 136 Hüküm no: 120 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe Hatun’un kendisini döverek çocuğunu düşürmesine sebep olduğu iddiasıyla Ayşe bt. Ahmed aleyhine açtığı davada yüz guruşa sulh olduğu Galata’da Câmi‘-i kebîr Mahallesi’nde sâkine ve zâtı vech-i şer‘î üzere mu‘arrefe Şerife Âişe bt. es-Seyyid el-Hâc Ahmed nâm hatun Galata Bâb Mahkemesi’nde meclis-i şer‘de kasaba-i Kasımpaşa’da Yahya Kethüdâ Mahallesi’nde sâkine ve zâtı kezâlik mu‘arrefe diğer Âişe bt. Ahmed nâm hatun ile terâfu‘larında mezbûre diğer Âişe Hatun târih-i i‘lâmdan beş gün mukaddem mârrü’l-beyân Yahya Kethüdâ Mahallesi’nde sâkine olduğu menziline beni celb ve derûnunda sille ve yumruk ile batnıma bi-gayr-ı hak amdem darbetmekle bir gün mürûrunda tesîrinden nâşî dört aylık müstebînü’l-hilka bir meyyit cenîni ilkā etmemle mûcib-i şer‘îsini taleb ederim deyü zevci es-Seyyid Mustafa Beşe b. Ali nâm kimesne ile bi’l-ma‘iyye da‘vâya tasaddî-birle beynlerinde ba‘de vukū‘ı’l-münâza‘a beynlerine muslihûn tavassut edip zevcân-ı mezbûrân da‘vâ-yı mezkûrelerinden mezbûre diğer Âişe ile an-inkâr yüz guruş bedel-i makbûza ba‘de’s-sulh ve’l-kabûl makbûz-ı merkūma ve bedel-i sulh-ı merkūma müte‘allika da‘vâdan herbiri âharın zimmetini kabûlü hâvî ibrâ ve iskāt-birle kat‘-ı münâza‘a ve ref‘-i husûmet eyledik deyü ikrâr ve tasdîkleri tescîl ve mübâşirleri Dîvânhâne çavuşlarından Abdülbaki Çavuş yediyle huzûr-ı âlîlerine i‘lâm olundu. Fî 17 Ra sene [1]221.