Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 137 Hüküm no: 121 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çavuş b. İbrahim’in kendisini yaraladığı iddiası üzerine hapiste bulunan Şekercioğlu Ahmed Beşe’nin suçsuz olduğunun anlaşılıp serbest bırakıldığı Sâhib-i arzuhâl Şekercioğlu Ahmed Beşe b. Mustafa nâm kimesne Galata’da mahfil-i kazâda derûn-ı arzuhâlde mezkûrü’l-ism Ali Çavuş b. İbrahim b. Abdullah tarafından husûs-ı âtîde vekîl olduğu Dîvânhâne çavuşlarından Mehmed Çavuş b. Numan ve Mehmed Emin Çavuş b. Mustafa şehâdetleriyle sâbit olan Çukadâr-ı hazret-i sadâret-penâhî Mehmed Emin Ağa b. Osman muvâcehesinde târih-i i‘lâmdan on iki gün mukaddem refîkim gāib ani’l-meclis Mehmed nâm şâbb-ı emred ile Kasımpaşa sınırı dâhilinde giderken müvekkil-i mezbûr Ali Çavuş’un garaz kasdıyla refîkim gāib-i mezbûr Mehmed’in üzerine hücûm ve müşâcere esnâsında refîkim mezbûr müvekkil-i mezbûru kendi bıçağıyla iki yerinden darb ve cerh ve firâr eyledikde mecrûh-ı mezbûr Ali Çavuş bi-gayr-ı vechin beni zâbitâna ahz ve habsettirip cârih-i firârî-i mezbûru benden mütâlebe sadedinde iken işbu bir kıt‘a i‘lâm mantûkunca mahbûs iken beni mübâşir ma‘rifetiyle Kasımpaşa Mahkemesi’ne ihzâr ve husûs-ı mezkûru bana isnâd ile “cârihim sensin beni sen darb ve cerh eyledin” deyü benden da‘vâ ve iki nefer şâhid ile isbât etmeğin cerh-i mezkûrun mûcibi berî’-i tâm husûlüne tevkīf olunup kemâ-kân beni habsde ibkā etmeleriyle madde-i merkūme vâkı‘ın hilâfı idüğü meşhûr ve mütevâtir olmağın Kasımpaşa ahâlîsinden erbâb-ı vukūf ber-vech-i tafsîl keyfiyet-i maddeyi mecrûh-ı mezbûra inhâ ve sebîlim tahliye olunması istircâ eylediklerinde mecrûh-ı müvekkil-i mezbûr dahi cevâbında gerçi beni ber-vech-i meşrûh darb ve cerh eden gāib-i firârî-i mezbûr Mehmed nâm şâbb-ı emreddir mahbûs-ı merkūmun kat‘â i‘ânet ve medhali yokdur lâkin mahbûs-ı mezbûr Ahmed Beşe cârih-i merkūmun mücerred refîki olup bana teslîm etmediği ecilden garaza mebnî vâkı‘ın hilâfı mezbûrdan da‘vâ ve şâhid-i zûr ile müdde‘âyı isbât etmişidim deyü mahzar-ı şuhûdda ikrâr u i‘tirâf ve işhâd etmekle binâen-aleyh sebîlim tahliye olunmak matlûbumdur deyü ba‘de’d-da‘vâ ve’l-istintak vekîl-i mezbûr Mehmed Emin Ağa cevâbında husûs-ı mezkûru külliyyen inkâr etmekle müdde‘î-i mezbûr ber-vech-i meşrûh müdde‘âsını Kasımpaşa ahâlîsinden olup lede’t-tezkiye adl ve makbûlü’ş-şehâde idükleri ihbâr olunan es-Seyyid Mehmed b. es-Seyyid Mustafa ve es-Seyyid Abdurrahman b. es-Seyyid Ömer [ve] Topçu Ömer b. Ahmed ve es-Seyyid Mehmed b. Hasan nâm dört nefer kimesneler şehâdetleriyle vekîl-i mezbûr muvâcehesinde vech-i şer‘î üzere isbât etmeğin mûcebince mezbûr Ahmed Beşe’ye şer‘an nesne lâzım gelmeyip sebîli tahliye ve müvekkil-i mecrûh-ı mezbûr ber-vech-i meşrûh darb ve cerh da‘vâsıyla mezbûr Ahmed Beşe’ye bî-vech-i şer‘î mu‘ârazadan men‘ olunmağla husûs-ı mezkûr için Kasımpaşa Mahkemesi’nden çend rûz mukaddemce verilen i‘lâm-ı mezkûrun kaydı terkīn olunmak bâbında musarrah fermân-ı âlî sudûru ihzâr eylediği bi’[l]-iltimâs huzûr-ı âlîlerine i‘lâm olundu. Fî 17 Ra sene [1]221.