Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 138 Hüküm no: 122 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çivici Avram v. Markado’nun mismar bedelinden Hekim Yanaki v. Zakari’den yüz yetmiş guruş alacağı olduğu Galata’da mütemekkin Çivici Avram v. Markado nâm Yahûdi Galata Bâb Mahkemesi’nde meclis-i şer‘de Hekim Yanaki v. Zakari nâm zimmî muvâcehesinde mersûm Yaniki zimmî zimmetinde vezn ve fiyatı beynimizde ma‘lûm mismâr semeninde alacak hakkım olan bin yüz seksen guruşun dokuz yüz guruşunu bundan akdem yedinden ba‘de’l-ahz bâkī kalan iki yüz seksen guruşu mersûm Yanaki zimmîden taleb ederim deyü da‘vâ ettikde ol dahi cevâbında Yahûdi-i mesfûra mismâr semeninden ancak bin yüz yetmiş guruş deynim olup müdde‘î-i Yahûdi-i mesfûr kabzını mukırr u mu‘terif olduğu dokuz yüz guruşu fürûnihâde kılınıp zimmetimde bâkī kalan yüz yetmiş guruşu târih-i i‘lâmdan sekiz ay mukaddem Galata hâricinde Beyoğlu nâm mahalde mütemekkin olduğum menzilim derûnunda elli guruş bedel-i makbûza benimle sulh olup mâ‘adâ yüz yirmi guruşa müte‘allika da‘vâdan benim zimmetimi ibrâ ve iskāt ben dahi ibrâsını kabûl etmişidim deyü eylediği def‘ini ve ziyâde yüz on guruşu herbiri ba‘de’l-inkâr müdde‘î-i Yahûdi-i mesfûr ziyâde-i mezkûre yüz on guruşu müdde‘âsını beyâna ba‘de’l-havâle dâfi‘-i mersûm Yanaki zimmî def‘-i mezkûruna ikāmet-i beyyine edemeyip ve tâlib-i tahlîf dahi olmamağın mûcebince mersûm Yanaki zimmînin ikrârıyla lâzım gelen meblağ-ı bâkī-i mezkûr yüz yetmiş guruşu müdde‘î-i mersûm Avram Yahûdi’ye edâ ve teslîme mersûm Yanaki zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 17 Ra sene [1]221.