Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 139 Hüküm no: 123 Orijinal metin no: [11a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Melitos’un mevcut olmayan keresteyi satışı meşru olmadığından satış öncesinde Tuşlu Ahmed’den aldığı beş guruşu iade etmesi gerektiği Tuşlu Ahmed b. Mehmed Galata Bâb Mahkemesi’nde meclis-i şer‘de Keresteci Melitos v. Nikola zimmî muvâcehesinde mersûm Melitos zimmî târih-i i‘lâmdan dört gün mukaddem mülkünde olmayıp yedinde mevcûd olmayan bin aded koğuş tahtasının beher adedini yirmi dörder paradan cem‘an altı yüz guruşa bana bey‘a va‘ad ve ber-vech-i peşin elli guruşumu kabz etmekle suâl olunup meblağ-ı merkūmdan bâkī beş yüz elli guruşu dahi yedimden ahz-birle ol kadar tahtayı tedârük ve bana teslîme zimmî-i mersûma tenbîh olunmak murâdımdır deyü tasaddî eylediği bey‘ u şirâ’ da‘vâsı hîn-i bey‘de mebî‘in adem-i vücûdunu mukırr u mu‘terif iken meşrû‘a ve mu‘tebere olmayıp mersûm Melitos zimmî semen olmak üzere müdde‘î-i mezbûr mâlından ancak beş guruş kabzını ikrâr u i‘tirâf ziyâde kırk beş guruşu ba‘de’l-inkâr müdde‘î-i mezbûr ber-vech-i muharrer ziyâde müdde‘âsına ikāmet-i beyyineye kādir ve tahlîfe tâlib olmamağın mûcebince müdde‘î-i mezbûr ber-vech-i muharrer ol kadar tahta mütâlebesiyle bî-vech-i şer‘î ve ziyâde kırk beş guruşu müdde‘âsıyla bilâ-beyyine zimmî-i mersûma mu‘ârazadan ba‘de’l-men‘ kabzını mu‘terif olduğu meblağ-ı merkūm beş guruşun müdde‘î-i mezbûra redd ü teslîme mersûm Melitos zimmî ilzâm olunduğu bi’l-iltimâs [huzûr-ı âlîlerine i‘lâm olundu.] Fî 18 Ra sene [1]221.