Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 139 Hüküm no: 124 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıbrıslı Dülger Sava’nın menzil tamiri için yaptığı masrafını Margarita bt. Papa Yorgi’den tahsil edip zimmetini ibra ettiği Mahrûse-i Galata hâricinde Tatavla karyesi ahâlîsinden Kıbrıslı Dülger Sava v. Yorgi nâm zimmî mahrûse-i mezbûre Bâb Mahkemesi’nde meclis-i şer‘de karye-i merkūme ahâlîsinden mu‘arrefetü’ş-şahs Margarita bt. Papa Yorgi nâm Nasrâniye muvâcehesinde nezâreti mahrûse-i mezbûre kādılarına meşrûta evkāfdan merhûm eş-Şeyh Mustafa Efendi’nin kasaba-i Tophane’de İlyas Çelebi Türbesi’nin îkād-ı kanâdil vakfı müstağallâtından karye-i merkūmede kâin bir tarafdan Dimitri menzili ve bahçesi ve bir tarafdan Sakızlı Koladidane menzili ve tarafeyni tarîk-i âm ile mahdûd müştemilâtı mütevellî temessüğünde mastûr beher yevm iki akçe icâreli bir bâb vakıf menzil Nasrâniye-i mersûmenin ber-mûceb-i temessük uhde ve tasarrufunda iken Nasrâniye-i mersûme menzil-i mahdûd-ı merkūmu kendi beni ölünceye değin görüp gözetmek şartıyla bana bâ-re’y-i mütevellî ferağ etmişidi el-hâletü hâzihî ferağ-ı merkūmun şart-ı fâsidin mukārenetiyle fesâdına binâen menzil-i merkūmu re’y-i mütevellî ile geri tefevvüze tasaddî-birle beynimizde ba‘de vukū‘ı’l-münâza‘a beynimize muslihûn tavassut edip menzil-i merkūmun ta‘mîr ve termîmine masrûfum olan iki yüz guruşu Nasrâniye-i mersûme bana def‘ u teslîm ben dahi yedinden ahz u kabz edip ziyâde masrûf mütâlebesine ve târih-i i‘lâma gelince beynimizde cârî hukūk-ı şer‘iyyeye müte‘allika da‘vâdan Nasrâniye-i mersûmenin zimmetini kabûlü hâvî ba‘de’l-ibrâ menzil-i merkūmu re’y-i mütevellî ile sâhibe-i ûlâ-i mersûme Margarita Nasrâniye’ye geri ferağ ve teslîme ta‘ahhüd-i tâm eyledim deyü ikrâr ve tasdîkleri tescîl ve bi’l-iltimâs [huzûr-ı âlîlerine i‘lâm olundu.] Fî 19 Ra sene [1]221.