Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 141 Hüküm no: 127 Orijinal metin no: [11b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şa‘riyeci Boduroğlu Mardros ve ortağı Yani’nin Hatice Hatun ve kardeşi Mustafa Usta’dan gedik-baha namıyla yüz elli guruş alacakları olduğu Galata hâricinde Kâtib Mustafa Çelebi Mahallesi’nde mütemekkin Şa‘riyeci Boduroğlu Mardros v. Mıgırdıç ve şerîki Yani v. Taş nâm zimmîler Galata Bâb Mahkemesi’nde meclis-i şer‘de Galata’ya muzâfe kasaba-i Tophane’de Karabaş Mustafa Ağa Mahallesi’nde sâkine Hadice Hatun bt. el-Hâc Ahmed ile li-ebeveyn er karındaşı Mustafa Usta taraflarından husûs-ı âtîde vekîl olduğu zât-ı mezbûreyi ârifân Mehmed b. İsmail ve Hüseyin b. Hüseyin şehâdetleriyle sâbit olan Dergâh-ı âlî topçularından birinci bölük top ustası Ahmed Usta b. el-Hâc Mehmed nâm kimesne muvâcehesinde müvekkilân-ı mezbûrânın Galata hısnı ebvâbından Küçükkule Kapısı hâricinde vâki‘ bi’l-icâreteyn mutasarrıf oldukları bir bâb şa‘riyece dükkânını târih-i i‘lâmdan altı buçuk sene mukaddem beher şehr iki yüz seksen paraya bize îcâr ve gedik-bahâ nâmıyla mâlımızdan yüz elli guruşumuzu ahz ve yedimize bir kıt‘a gedik temessüğü i‘tâ etmeleriyle biz dahi müvekkilân-ı mezbûrânın bi-şartü’r-rücû‘ emirleriyle dükkân-ı merkūmun ta‘mîr ve termîmine mâlımızdan iki bin yedi yüz elli guruş sarf eylediğimizden sonra beynimizde olan akd-i icâreyi fesh ile dükkân-ı mezkûreden bizi bâ-i‘lâm-ı şer‘î ihrâc etmeleriyle ber-vech-i muharrer müvekkilân-ı mezbûrâna medfû‘larımız olan yüz elli guruş ve masrûfumuz olan meblağ-ı mezkûr iki bin yedi yüz elli guruş ki cem‘an iki bin dokuz yüz guruşu müvekkilân-ı mezbûrândan hâlâ taleb ederiz deyü da‘vâ eylediklerinde vekîl-i mezbûr Ahmed Usta dahi cevâbında müvekkilân-ı mezbûrân gedik-bahâ nâmıyla ancak yüz elli guruş ahzlarını ikrâr emr-i mezkûru külliyyen ba‘de’l-inkâr müdde‘iyân-ı mersûmân ber-vech-i muharrer emr-i mezkûr müdde‘âlarını lede’l-istimhâl ve’l-imhâl müddet-i mehl-i şer‘î mürûr edip ikāmet-i beyyineye kādirler ve tâlib-i tahlîf dahi olmamalarıyla mûcebince müdde‘iyân-ı mersûmân emr-i mezkûr da‘vâlarıyla müvekkilân-ı mezbûrâna bilâ-beyyine mu‘ârazadan ba‘de’l-men‘ müvekkilân-ı mezbûrânın gedik-bahâ nâmıyla makbûzları olan meblağ-ı mezkûr yüz elli guruşu müdde‘iyân-ı mersûmâna redd ü teslîme müvekkilân-ı mezbûrâna izâfetle vekîl-i mezbûr Ahmed Usta’ya tenbîh olunduğu bi’l-iltimâs [huzûr-ı âlîlerine i‘lâm olundu.] Fî 11 Ra sene [1]221.