Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 141 Hüküm no: 128 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İzmirli Seyyid Hasan’ın içerisinde altın paralar bulunan kesesini dükkânlarında unuttuğu iddiasıyla Tenekeci Yasef ve ortağı diğer Yasef aleyhine açtığı davada yüz guruşa sulh olduğu İzmirli es-Seyyid Hasan b. es-Seyyid İshak Galata’da meclis-i şer‘de Tenekeci Yasef v. Salamon ve şerîki diğer Yasef v. Abram nâm Yahûdiler muvâcehelerinde ben târih-i i‘lâmdan altı gün mukaddem Yahûdiyân-ı mersûmânın mütemekkin oldukları Galata’da tenekeci dükkânına teneke iştirâsı için vardığımda bir beyaz örme kîse derûnunda mevzû‘ iki yüz altmış iki guruşluk mahlût altınlarım sehven dükkân-ı mezkûr derûnunda kalmağla Yahûdiyân-ı mersûmân bi-gayr-ı hak ahz etmeleriyle istirdâd ederim deyü tasaddî eylediğim da‘vâmdan bâ-tavassut-ı muslihîn Yahûdiyân-ı mersûmân ile yüz guruşa an-inkâr ba‘de’s-sulh ve’l-kabûl bedel-i sulh-ı mezkûrdan mâ‘adâ yüz altmış iki guruşa müte‘allika da‘vâdan Yahûdiyân-ı mersûmânın zimmetlerini kabûllerini hâvî ba‘de’l-ibrâ ibrâdan müstesnâ bedel-i sulh-ı mezkûr yüz guruşu Yahûdiyân-ı mersûmân zimmetlerinde kalmağla taleb ederim deyü ba‘de’d-da‘vâ ve’l-ikrâr alâ-mûcibi ikrârihi bedel-i sulh-ı mezkûr yüz guruşun müdde‘î-i mezbûr es-Seyyid Hasan’a edâsıyla Yahûdiyân-ı mersûmân ilzâm olundukları bi’l-iltimâs [huzûr-ı âlîlerine i‘lâm olundu.] Fî 22 Ra sene [1]221.