Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 142 Hüküm no: 130 Orijinal metin no: [12a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ezmarağda bt. Nikoli’nin alacağını tahsil edip kendisine teslim eden vekili Keresteci Suteri v. Apostol’un zimmetini ibra ettiği Mahrûse-i Galata’da Sultan Bayezid Mahallesi’nde mütemekkine ve şahsı vech-i şer‘î üzere mu‘arrefe Ezmarağda bt. Nikoli Nasrâniye Galata Bâb Mahkemesi’nde meclis-i şer‘de Keresteci Suteri v. Apostol zimmî muvâcehesinde sâbıkā güveyim gāib ani’l-meclis Sarraf Labik zimmî zimmetinde alacağım olan meblağ-ı ma‘lûmeyi taleb ve da‘vâ ve ahz u kabza ve makbûzunu bana teslîme mersûm Suteri zimmîyi işbu bir kıt‘a hüccet-i şer‘iyye nâtıka olduğu üzere bundan akdem tarafımdan vekîl nasb ü ta‘yîn etmişidim mersûm Suteri zimmî gāib-i mersûmdan makbûzu olan iki yüz elli guruşun yüz kırk guruşunu emr ve tevkîl ile benim umûr-ı lâzımeme harc u sarf ve mâ‘adâ yüz on guruşunu işbu meclis-i şer‘de bana def‘ u teslîm ben dahi ahz u kabz edip mersûm Suteri zimmî yedinde makbûzu olan meblağ-ı mezkûrdan bir akçe ve bir habbe alacak hakkım bâkī kalmayıp vekâlet-i merkūmeden dahi zimmî-i mersûmu azl eyledim deyü ikrâr ve tasdîkleri bi’[l]-iltimâs huzûr-ı âlîlerine i‘lâm olundu. Fî 19 Ra sene [1]221.