Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 145 Hüküm no: 138 Orijinal metin no: [12b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Reis’in kömür bedelinden Fesci Seyyid Kasım’dan ikrarı üzere on beş guruş alacağı olduğu Sefîne reislerinden Ahmed Reis b. el-Hâc İsmail nâm kimesne Galata Bâb Mahkemesi’nde meclis-i şer‘de Fesci es-Seyyid Kasım b. es-Seyyid Mehmed muvâcehesinde mezbûr es-Seyyid Kasım zimmetinde vezn ve fiyatı beynimizde ma‘lûm kömür semeninden elli sekiz guruş alacak hakkım olmağla hâlâ taleb ederim deyü da‘vâ ettikde ol dahi cevâbında müdde‘î-i mezbûrdan ancak on beş guruşluk kömür iştirâ ve kabz eylediğini ikrâr ziyâde müdde‘âsını inkârından gayrı meblağ-ı merkūm on beş guruşu dahi kendiye tamamen edâ ve teslîm eyledim deyü mikdâr-ı mezkûrda eylediği def‘ini mezbûr Ahmed Reis ve ziyâdeyi merkūm es-Seyyid Kasım münkir olmalarıyla tarafeyn beyâna havâle olundukda herbiri ikāmet-i beyyineden izhâr-ı acz-birle bi’t-taleb mezbûrândan herbiri vech-i şer‘î üzere tahlîf olunmağın mûcebince müdde‘î-i mezbûr Ahmed Reis ziyâde kırk üç guruş mütâlebesiyle mezbûr es-Seyyid Kasım’a bilâ-beyyine mu‘ârazadan ba‘de’l-men‘ mezbûr es-Seyyid Kasım’ın ikrârıyla lâzım gelen on beş guruşu müdde‘î-i mezbûr Ahmed Reis’e edâ ve teslîme mezbûr es-Seyyid Kasım’a tenbîh olunduğu. Fî 25 Ra sene [1]221.