Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 825 Hüküm no: 1076 Orijinal metin no: [129a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb Bey b. Halil’in kaybettiği kölesi Yuvan’ı Mustafa ve Receb adlı kardeşlerde bulduğu ve kendisine ait olduğunu ispat ettiği Mahmiye-i İstanbul’da Yarhisârî Mustafa Efendi mahallesinde sâkin bâ‘isü’l-kitâb Receb Bey b. Halil nâm kimesne meclis-i şer‘-i şerîf-i lâzımü’t-tevkīrde rıkkıyyetini mu‘terif zikri âtî gulâma ale’l-iştirâki’s-seviy vâzı‘ayi’l-yed olan Mustafa ve Receb ibney Ali nâm kimesneler mahzarlarında üzerlerine da‘vâ ve takrîr-i kelâm edip işbu meclis[de] orta boylu, açık kaşlı, elâ gözlü, sağ dirseğinde çıkık alâmeti olup Rûsiyyü’l-asl olan Yuvan nâm şâbb-ı emred abd-i memlûküm olup mülkümde olduğu hâlde târih-i kitâbdan bir sene mukaddem mahmiye-i mezbûrede vâki‘ dükkânımdan zâyi‘ etmişidim, hâlâ mezbûrânın yedlerinde buldum suâl olunup kasr-ı yed ve bana teslîme tenbîh olunmak matlûbumdur dedikde, gıbbe’s-suâl mezbûrân Mustafa ve Receb cevâblarında işbu abd-i mezbûru târih-i kitâbdan dört ay mukaddem Bahçesarayı’nda isimleri ma‘lûmumuz değil bir Tatar ile bir Sultan sekbânından ol vilâyetde kırk altın ta‘bîr olunur altmış guruşa ber vech-i iştirâk iştirâ ve def‘-i semen eyledik, mezbûrun mülkü olup mülkünden zâyi‘ olduğu ma‘lûmumuz değildir, deyû mülkü olduğunu inkâr ettiklerinde, müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahalle-i mezbûre sükkânından Ali Beşe b. Osman ve Mehmed Beşe b. Halil nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mevsûf-ı mezbûr Yuvan müdde‘î-i mezbûrun mülkü olup mülkünde olduğu hâlde zâyi‘ oldu, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra müdde‘î-i mezbûr Receb Bey’e mevsûf-ı mezbûr Yuvan’ı bey‘ veya hibe ve turûk-ı şer‘îden bir tarîk ile mülkünden ihrâc etmediğine yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince mevsûf-ı mezkûrdan kasr-ı yed edip müdde‘î-i mezbûra teslîme mezkûrân Mustafa ve Receb’e tenbîh olunup mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Abdüllatîf Beşe b. Mehmed el-Mübâşir, Hasan Efendi b. Mustafa, Hacı İbrahim b. Ali, Murtaza b. Abdullah.