Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 826 Hüküm no: 1077 Orijinal metin no: [129a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen İsmail Çelebi b. Ahmed’in, Toygar Hamza Vakfı’na olan borcunun mütevelli tarafından terekesinden tahsil edildiği Mahrûse-i Üsküdar’da Toygar Tepesi mahallesinde sâkin iken bundan akdem vefât eden merhûm Toygar Hamza vakfı’nda mütevellî olan İbrahim Efendi b. Ramazan meclis-i şer‘-i şerîfde mahmiye-i İstanbul’da Hatice Sultan mahallesi ahâlîsinden olup bundan akdem cezîre-i Girit’de vefât eden İsmail Çelebi b. Ahmed’in kız karındaşı kızı ve hasren vârisesi olup tereke-i vâfiyesine vâzı‘atü’l-yed olan bâ‘isetü’l-kitâb Âişe bt. Ahmed nâm hâtun mahzarında ikrâr ve takrîr-i kelâm edip mâl-ı vakf-ı mezbûrdan cihet-i şer‘îden müteveffâ-yı mezbûr zimmetinde olan on bir bin yüz akçeyi mezbûre Âişe yedinden tereke-i müteveffâ-yı mezbûrdan tamâmen ahz u kabz eyledim min ba‘d mâl-ı vakf-ı mezbûrdan zimmetinde bir akçe ve bir habbe bâkī kalmadı dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Hasan Efendi b. Bayram, Ahmed Çelebi b. Mehmed, Abdülkādir Çelebi b. Mehmed, Mehmed Çelebi b. İvaz, Mustafa Çelebi b. Yusuf.