Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 152 Hüküm no: 153 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusyalı Angeli v. Mihal’in beş yüz doksan dört guruş alacağı olduğu Kostantin v. Mihaylo ile yüz elli guruşa sulh olduğu Derkenâr mantûkunca Rusyalı Angeli v. Mihal nâm müste’mene bâ-temessük ve bâ-i‘lâm-ı şer‘î mahkûmün-bih beş yüz doksan dört guruş deyni için on bir aydan beri Galata Zindânı’nda mahbûs olan sâhib-i arzuhâl Kostantin v. Mihaylo nâm zimmî Galata Bâb Mahkemesi’nde meclis-i şer‘de d[â]yin-i müste’men-i mersûm Angeli tarafından ber-vech-i âtî sulh ve ibrâya vekîl-i müsbet-i şer‘îsi Rusyalı Yanidora v. Nikola nâm müste’men muvâcehesinde Rusya tercümânlarından Pizani hâzır olduğu hâlde ben bundan akdem ber-vech-i muharrer deyn-i mezkûrum için târih-i merkūmdan beri Galata’da sicn-i sultânîde mahbûs olup lâbis olduğum köhne libâsımdan gayrı ism-i mâl ıtlâk olunur nesnem olmayıp mu‘dim ve mu‘sir olmamla bir vechile edâ-yı deyne iktidârım olmamağla refâh-ı hâle kadar sebîlim tahliye olunmak matlûbumdur deyü asârını da‘vâ ve vekîl-i merkūm dahi yesârını iddi‘â-birle beynlerinde ba‘de vukū‘ı’l-münâza‘a ve bâ-vesâtet-i muslihîn vekîl-i müste’men-i mersûm tasaddî eylediği mahkûmün-bih mezkûr beş yüz doksan dört guruş da‘vâsından mesfûr Kostantin zimmî ile yüz elli guruş bedel-i makbûza bi’l-vekâle sulh olup mâ‘adâ dört yüz kırk dört guruşa müte‘allika da‘vâdan mersûm Kostantin zimmînin zimmetini ibrâ eyledikde ol dahi sulh ve ibrâyı kabûlü-birle kat‘-ı münâza‘a eyledikleri tescîl-i mezbû[r] vechile sebîli tahliye olunduğu mübâşirleri Ali Çavuş kulları yediyle huzûr-ı âlîlerine i‘lâm olundu. Fî 3 Ra sene [1]221.