Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 154 Hüküm no: 158 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa b. Ahmed’in emanet olarak verdiği binişini iade etmediği iddiasıyla Müezzin Mustafa Efendi aleyhine açtığı davada sulh olduğu Mahmiye-i İstanbul’da sâkin Mahmud Ağa b. Ahmed nâm kimesne Galata Bâb Mahkemesi’nde meclis-i şer‘de medîne-i Üsküdar’a muzâfe Yoros nâhiyesine tâbi‘ Beykoz karyesi müezzini Mustafa Efendi b. Mehmed Emin muvâcehesinde ben işbu hâzır bi’l-meclis hizmetkârım Osman yediyle mezbûr Mustafa Efendi yedine mâlımdan îdâ‘ ve teslîm eylediğim seksen beş guruş kıymetli mor çuka bir binişimi te‘addîsiyle istihlâk etmekle ba‘de’s-sübût kıymet-i mezkûresini mezbûr Mustafa Efendi’den tazmîn taleb ederim deyü tasaddî eylediğim da‘vâmdan bâ-vesâtet-i muslihîn mezbûr Mustafa Efendi ile an-inkâr yirmi beş guruş bedel-i makbûza ba‘de’s-sulh ve’l-kabûl zikrolunan binişin mâ‘adâ kıymetine ve bedel-i sulh-ı merkūma müte‘allika da‘vâdan herbirimiz âharın zimmetini ibrâ ve iskāt eyleyip ve herbirimiz ber-vech-i muharrer âharın ibrâsını kabûl-birle kat‘-ı münâza‘a eyledik deyü ikrâr ve tasdîkleri huzûr-ı âlîlerine i‘lâm olundu. Fî 6 R sene [1]221.