Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 154 Hüküm no: 159 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Salih’in alacağı olduğu iddiasıyla İsmail Beşe aleyhine açtığı davada yüz on yedi buçuk guruşa sulh olduğu Galata’ya muzâfe kasaba-i Tophane’de Ekmekçibaşı Mahallesi’nde sâkin sâhib-i arzuhâl es-Seyyid Mehmed Salih b. Mustafa nâm kimesne bi’t-terâzî Galata Bâb Mahkemesi’nde meclis-i şer‘de derûn-ı arzuhâlde mezkûrü’l-ism İsmail Beşe b. Ali nâm kimesne muvâcehesinde mezbûr İsmail Beşe zimmetinde cihet-i karzdan iki yüz otuz beş guruş alacağ[ım] olmağla hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr İsmail Beşe ile an-inkâr yüz on yedi buçuk guruşa ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ yüz on yedi buçuk guruşa müte‘allika da‘vâdan mezbûr İsmail Beşe’nin zimmetini kabûlü hâvî ba‘de’l-ibrâ ibrâdan müstesnâ bedel-i sulh-ı mezkûr mezbûr İsmail Beşe’nin zimmetinde kalmağla hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihi bedel-i sulh-ı mezkûr yüz on yedi buçuk guruşu müdde‘î-i mezbûr es-Seyyid Mehmed Salih’e edâ ve teslîme mezbûr İsmail Beşe’ye tenbîh olunduğu tescîl ve mübâşirleri es-Seyyid Hasan Çavuş kulları yediyle huzûr-ı âlîlerine i‘lâm olundu. Fî 6 R sene 1221.