Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 155 Hüküm no: 160 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marya bt. Nikola’nın firar eden kocasının yerini kendisine söylemesi için kocasının ortağı Terzi Petro aleyhine açtığı davanın meşru olmadığı Galata’ya muzâfe kasaba-i Beşiktaş’da mütemekkine ve şahsı ta‘rîf-i şer‘î ile mu‘arrefe Marya bt. Nikola nâm Nasrâniye Galata Bâb Mahkemesi’nde meclis-i şer‘de abacı derzilerinden Petro v. Yorgi nâm zimmî muvâcehesinde zevcim gāib ani’l-meclis Sava zimmî mersûm Petro zimmînin şerîki olmağla târih-i i‘lâmdan dört gün mukaddem zevcim gāib-i mersûmun mâlı olup bi’l-ma‘iyye mütemekkine olduğumuz menzil derûnunda mevcûd eşyâsından mecmû‘u yüz doksan guruş kıymetli bir neftî çuka biniş ve bir Bayburdî çuka cübbe ve bir şâlî anteri ve bir kalpak ve bir neftî çuka şalvarını şâkirdleri işbu hâzır bi’l-meclis Yakomi ma‘rifetiyle zevcim merkūm ahz ve diyâr-ı âhara firâr ve gaybet etmişidi el-hâletü hâzihî zevcim gāib-i mersûm mâlı olan eşyâ-i muharrere-i mezkûreyi şerîki mesfûra îdâ‘ ve teslîm eyledi deyü mesmû‘um olmağla bu sûretde zevcim gāib-i mersûmun mekânını haber versin yâhud eşyâ-i mezkûreyi bana teslîm eylesin deyü tasaddî eylediği da‘vâsı takrîr-i meşrûhu üzere meşrû‘a olmayıp mersûm Petro zimmîye suâl dahi teveccüh etmediği huzûr-ı âlîlerine i‘lâm olundu. Fî 6 R sene 1221.