Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 155 Hüküm no: 161 Orijinal metin no: [14b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serope v. Simon’un karzdan alacağı olduğu iddiasıyla Demirci Varteris aleyhine açtığı davada seksen guruşa sulh olduğu Duhânî Serope v. Simon nâm zimmî Galata Bâb Mahkemesi’nde meclis-i şer‘de Demirci Varteris v. Mıgırdıç nâm zimmî muvâcehesinde mersûm Varteris zimmî zimmetinde bâ-temessük cihet-i karzdan üç yüz guruş alacağım olup meblağ-ı merkūmu bundan akdem taleb eylediğimde medyûnum zimmî-i mersûm mâlından iki çuka biniş ve bir çuka cübbe ve mahbûbe bir kırmızı anterisi ve iki gezî anteri ve bir sim sa‘at ve bir sim tas ve on dokuz dirhem sim tel ve bir sim kaşığı bana def‘ u teslîm ve âhara bey‘ ve semenini deyn-i mezkûra mahsûben kabz eyle deyü emr ve tarafından beni tevkîl ben dahi eşyâ-i merkūmeyi bi-safkatin vâhidetin yüz yetmiş dokuz guruş semen-i makbûza bi’l-vekâle bey‘ ve semen-i merkūmun bir guruşunu kendiye def‘ u teslîm ve yirmi sekiz guruşunu mersûmun derneğinde hîn-i tezvîcinde umûr-ı lâzıme-i ma‘lûmesine harc u sarf ve yüz elli guruşunu deyn-i mezkûru olan üç yüz guruşun ol mikdârına mahsûb edip bu vechile mersûmun zimmetinde yüz elli guruş bâkī alacak hakkım kalmağla meblağ-ı bâkī-i mezkûr yüz elli guruşu mersûm Varteris zimmîden hâlâ taleb ederim deyü tasaddî eylediğim da‘vâmdan bâ-vesâtet-i muslihîn mersûm Varteris zimmî ile seksen guruşa ba‘de akdi’l-musâlaha ve’l-kabûl ben bedel-i sulh-ı mezkûrdan mâ‘adâ yetmiş guruşa müte‘allika da‘vâdan mersûm Varteris zimmînin zimmetini ibrâ ve iskāt ol dahi eşyâ-i mezkûreye ve ziyâde kıymetlerine müte‘allika da‘vâdan kezâlik benim zimmetimi ibrâ ve iskāt ve herbirimiz âharın ibrâsını kabûl eyledik deyü müdde‘î-i mukırr-ı mersûm Serope zimmîye bi’l-cümle kelimât-ı meşrûhasında medyûn-ı mersûm Varteris zimmî ba‘de’t-tasdîk ibrâdan müstesnâ bedel-i sulh-ı mezkûr seksen guruş mersûm Varteris zimmîye deyni olduğunu ikrâr u i‘tirâf etmeğin alâ-mûcibi ikrârihi bedel-i sulh-ı mezkûr seksen guruşun müdde‘î-i mesfûr Serope zimmîye edâsıyla mersûm Varteris zimmî ilzâm olunduğu bi’[l]-iltimâs huzûr-ı âlîlerine i‘lâm olundu. Fî 4 R sene 1221.