Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 156 Hüküm no: 162 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bedros ve ortağı Haçador’un habbaz fırınlarına bağlı iskemle denilen ekmek dükkanı gediklerine Asador v. Koncasol’un müdahalesinin men‘i Galata hısnı ebvâbından Azabkapısı dâhilinde vâki‘ habbâz fırını ustalarından Bedros v. Masar ve şerîki Haçador v. Zakar nâm zimmîler Galata Bâb Mahkemesi’nde meclis-i şer‘de Asador v. Koncasol nâm zimmî muvâcehesinde mersûm Asador’un anası şahsı mu‘arrefe Biricik bt. Serkiz nâm Nasrâniye hâzıra olduğu hâlde fırın-ı mezkûrun ez-kadîm mu‘ayyen ve mahsûs iskemlesi olup Galata hısnı ebvâbından Balıkpazarı Kapısı hâricinde kâin el-yevm manav ve derzi dükkânları beyninde vâki‘ bir kıt‘a dükkân işbu yedimizde olan bin yüz seksen bir senesi tarihiyle müverrah bir kıt‘a i‘lâm mantûkunca nizâm defterinde dahi mâ-takaddemden beri fırın-ı mezkûrun mu‘ayyen ve mahsûs iskemle tâ‘bir olunur nân-ı azîz bey‘ olunan dükkândan olmağla kadîmî üzere tarafımızdan zabt u tasarruf ve nân-ı azîz bey‘ olunagelip hattâ dükkân-ı mezkûrun mutasarrıfları el-Hâc Ahmed ve el-Hâc Osman ve el-Hâc İbrahim nâm kimesnelerin yedimize verdikleri îcâr ve istîcârı hâvî ber-minvâl-i muharrer tezkire mantûkunca ecânibden dahl ü ta‘arruz îcâb etmez iken tarafımızdan beyyâ‘ımız olmak üzere derûnunda mütemekkin olan merkūm Asador zimmî dükkân-ı merkūmun hâlî gediğine rağbet verip sarraf gediğindendir deyü dükkân-ı mezkûra bi-gayr-ı vechin müdâhale eder suâl olunup müdâhalesi men‘ olunmak matlûbumuzdur dediklerinde mersûm Asador zimmî cevâbında fi’l-hakīka dükkân-ı merkūm fırın-ı mezkûra merbût mu‘ayyen ve mahsûs iskemle tâ‘bir olunur dükkân olup derûnunda nân-ı azîz bey‘ olunageldiğini ikrâr lâkin dükkân-ı merkūmun hâlî gediğine ben ve anam mersûme rağbet verip ol vechile hâlî gediği bizim tasarrufumuzdadır dedikde anası hâzıra-i mersûme dahi oğlu mukırr-ı mesfûru eğerçi tasdîk edip mersûmânın yedlerinde gedik husûsuna dâir bir sened-i şer‘î yâhud bir temessük dahi olmayıp mersûmânın kavl-i mücerredleriyle gedik husûsuna dâir kelâmlarına i‘tibâr olunmayıp dükkân-ı mezkûru zimmîyân-ı mersûmâna teslîme mesfûr Asador zimmîye tenbîh olunduğu bi’[l]-iltimâs huzûr-ı âlîlerine i‘lâm olundu. Fî 6 R sene 1221.