Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 157 Hüküm no: 164 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Ömer Beşe’nin eski ticârî ortağı Hacı Mustafa aleyhine açtığı alacak davasında iki yüz seksen guruşa sulh olduğu Tüccârdan Ömer Beşe b. Abdullah Galata’da mahfil-i kazâda mukaddemâ şerîki el-Hâc Mustafa b. Hüseyin muvâcehesinde fâide-i hâsıla beynimizde müsâvî olmak üzere vücûh-ı tüccârdan mezbûr el-Hâc Mustafa ile bir müddet şerîk olup ba‘de feshi şirket-birle hesâbımızı rü’yet eylediğimizde mezbûrun makbûzu olan bin yedi yüz elli guruşdan benim hisseme sekiz yüz yetmiş beş guruş isâbet edip meblağ-ı merkūmun üç yüz altmış guruşunu bana teslîm edip mâ‘adâ beş yüz on guruşu yedinde kalmağla hâlâ taleb ederim deyü tasaddî eylediğim da‘vâmdan bâ-vesâtet-i muslihîn mezbûr el-Hâc Mustafa ile iki yüz seksen guruşa sulh olup mâ‘adâ iki yüz otuz guruşa müte‘allika da‘vâdan mezbûr el-Hâc Mustafa’nın zimmetini ibrâ eyledim dedikde ol dahi ber-vech-i meşrûh sulh ve ibrâyı ba‘de’l-kabûl ibrâdan müstesnâ bedel-i sulh-ı merkūm iki yüz seksen guruş müdde‘î-i mezbûr Ömer Beşe’ye deyni olduğunu ikrâr u i‘tirâf etmeğin alâ-mûcibi ikrârihi bedel-i sulh-ı merkūm iki yüz seksen guruşun müdde‘î-i mezbûr Ömer Beşe’ye bi’t-taleb edâsıyla mezbûr el-Hâc Mustafa ilzâm olunduğu bi’[l]-iltimâs huzûr-ı âlîlerine i‘lâm olundu. Fî 8 R sene 1221.