Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 158 Hüküm no: 165 Orijinal metin no: [15a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Aci Ligor’un alacağına kefil olan Hekim Ligor’dan on yedi buçuk guruş alacağı olduğu Galata ahâlîsinden Kuyumcu Aci Ligor v. Yorgi Galata Bâb Mahkemesi’nde meclis-i şer‘de Hekim Ligor v. Yosef zimmî muvâcehesinde bundan akdem hâlik Angeli v. Yorgi zimmî zimmetinde semen-i mebî‘den alacak hakkım olan on yedi buçuk guruşa mersûm Hekim sağlığında kefîl ve zâmin olmağla meblağ-ı merkūmu bi-hükmi’l-kefâle ve mersûm Hekim Ligor zimmî beni târih-i i‘lâm günü Galata’da kâin mütemekkin olduğu dükkânı önünde sille ve yumruk ile darb ve ta‘zîri mûcib elfâz ile muvâcehemde şetm etmekle mûcib-i şer‘îsini taleb ederim deyü da‘vâ eyledikde ol dahi cevâbında meblağ-ı mezkûr on yedi buçuk guruşa kefîl olduğunu ikrâr darb ve şetm-i merkūma ba‘de’l-inkâr müdde‘î-i mersûm ber-vech-i muharrer darb ve şetm müdde‘âsına ikāmet-i beyyine edemeyip bi’t-taleb mersûm Hekim Ligor’a yemîn teklîf olundukda yemînden nükûl etmeğin mûcebince bi’l-hükm mersûma şer‘an ta‘zîr lâzım geldikden sonra müdde‘î-i mersûm hakk-ı ta‘zîre müte‘allika da‘vâdan hekim-i mersûm Ligor’u afv ve ibrâ etmeğin meblağ-ı merkūm on yedi buçuk guruşun müdde‘î-i mersûm Aci Ligor’a edâsıyla hekîm-i mersûm ilzâm olunduğu bi’[l]-iltimâs huzûr-ı âlîlerine i‘lâm olundu. Fî 11 R sene 1221.