Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 158 Hüküm no: 166 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarabya köyünde “ayak berberi ustası” olduğunu iddia eden Hıristo v. Manol’un berber esnafının şikâyeti üzerine nizama uygun hareket etmeye söz verdiği Mahrûse-i Galata ve tevâbi‘inde vâki‘ berber esnâfının bâ-berât-ı âlî kethüdâları es-Seyyid Mustafa ve yiğitbaşıları es-Seyyid Osman ve müsinn ü ihtiyâr ustalarından Ahmed Usta ve Mehmed Usta ve İbrahim Usta ve zimmî ustalarından Tanaş ve Hakar [ve] Nikola ve Ohan ve Avadik ve sâir mazbûtü’l-esâmî ve sâir otuz neferi mütecâviz kimesneler meclis-i şer‘-i münîrde Hıristo v. Manol zimmî muvâcehesinde işbu yedimizde olan tuğra-yı garrâ ile müzeyyen bir kıt‘a emr-i âlî ve Başmuhâsebe’den i‘tâ olunan sûret-i defter mantûkunca Galata ve tevâbi‘inde kâin berber dekâkînleri kâfî ve vâfî olup ziyâde dükkân ihdâsı ve peyrevi olmayıp hâm-dest ve mechûlü’l-ahvâl re‘âyâ makūlesinin san‘at-ı merkūmeye müdâhalesi memnû‘ iken mersûm Hıristo zimmî mahrûse-i mezbûre muzâfâtından İstinye nâhiyesinde vâki‘ Tarabya karyesinde kâin iki kıt‘a berber dükkânlarının birinde mehâreti ve ustalığa istihkākı ma‘lûm oluncaya kadar re‘âyâ usta[ları] yanında bir müddet ücret-i misliyye ile kalfalık edip ba‘dehû mahâret ve istihkākı ma‘lûm ve re‘âyâ dükkânından biri mahlûl oldukda şirâen gediğine mâlik olup ondan sonra usta olmak ve yanına re‘âyâdan kalfa ve şâkird almak nizâm-ı kadîmimizden iken mersûm Hıristo zimmî mugāyir-i emr-i âlî ve nizâm-ı mer‘î ben ayak berberi ustası oldum deyü karye-i mezbûrede menâzil aralarında berber âlâtıyla geşt ü güzâr eylediğinden gayrı ziyâde dükkân ihdâsı dâ‘iyyesinde olmağla ol vechile bâ-berât-ı âlî nizâm-ı kadîmimizin izmihlâline bâdî harekete ictisâr eder deyü mazmûnu takrîr-i meşrûhlarına mutâbık bir kıt‘a emr-i âlî ve sûret-i defter-i hâkānî ibrâzıyla bi’l-muvâcehe teşekkî eylediklerinde mersûm Hıristo zimmî mazmûn-ı emr-i âlîşânı mukır ve ziyâde dükkân ihdâsı dâ‘iyesinde olduğunu mu‘terif olmağın ber-mantûk-ı emr-i âlî ve şürût-ı nizâm-ı mer‘î hareket etme[me]k üzere mersûm Hıristo’ya tenbîh olundukda mütenebbih olup el-yevm mevcûd olan dükkân gediklerinden birine mâlik ve mehâret ve istihkākı ma‘lûm oluncaya kadar bir usta yanında ücret-i misliyyesiyle kalfa olmağa ta‘ahhüd eyledikde esnâf-ı merkūme dahi râzı ve teşekkîlerinden fâriğ olup kat‘-ı münâza‘a eyledikleri tescîl ve bi’l-iltimâs huzûr-ı âlîlerine i‘lâm olundu. Fî R sene [1]221.