Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 159 Hüküm no: 167 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Biricik bt. Agop’un Aksabet bt. Artin’e ödedeği riba parasının kendisine iâdesine karar verildiği Beyoğlu’nda Yağcı odalarında mütemekkine şahsı mu‘arrefe sâhibe-i arzuhâl Biricik bt. Agop nâm Nasrâniyye damadı ve tarafından husûs-ı âti’z-zikrde vekîl olduğu Yoseb v. Aknandil ve Tatos v. Artin şehâdetleriyle zâhir olan Kılabdancı Hivon v. Agop zimmî Galata’da mahfil-i kazâda Yenimahalle’de mütemekkine ismi mersûme ve şahsı şer‘an mu‘arrefe Aksabet bt. Artin Nasrâniye muvâcehesinde mersûme Aksabet Nasrâniye’nin müvekkilem mersûme Biricik Nasrâniye bundan akdem mersûme Aksabet Nasrâniye yedinden ve mâlından iktirâz ve kabz ve ba‘dehû kendiye tamamen edâ ve teslîm eylediği yüz elli guruş mukābelesinde bilâ-devr-i şer‘î ribâ nâmıyla şehriye yüzer paradan elli dört ayda yüz otuz beş guruş verip ol dahi ba‘de’l-kabz hattâ târih-i i‘lâmdan üç ay mukaddem mahalle-i merkūmede mütemekkine olduğu menzili derûnunda müvekkilem mersûme yedinden müddet-i mezkûrede ber-vech-i mübeyyen ol kadar guruş bi-gayr-ı hak kabz eylediğini ikrâr u i‘tirâf dahi etmekle meblağ-ı mecmû‘-ı mezkûru bi’l-vekâle istirdâd murâd ederim deyü eylediği ribâ da‘vâsını mahallinde lede’t-tezkiye ve makbûlü’ş-şehâde idükleri ihbâr olunan esnâf-ı merkūmeden Artin v. Marat ve Kirkor v. Abraham nâm zimmîler şehâdetleriyle mersûme Aksabet Nasrâniye muvâcehesinde vech-i şer‘î üzere isbât etmeğin mûcebince meblağ-ı mecmû‘-ı merkūm yüz otuz beş guruşu müvekkile-i mersûme Biricik Nasrâniye için damadı müdde‘î-i vekîl-i mersûm Hivon zimmîye redd ü teslîme mersûme Biricik Nasrâniye’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 7 R sene [1]221.