Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 160 Hüküm no: 169 Orijinal metin no: [15b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Asvador’un seren direği bedelinden Manol v. Mihal’dan on guruş alacağı olduğu Yorgi v. Asvador zimmî Galata Bâb Mahkemesi’nde meclis-i şer‘de Manol v. Mihal zimmî muvâcehesinde mersûm Manol zimmî zimmetinde seren tâ‘bir olunur iki direk semenlerinden yüz elli guruşdan bâkī otuz guruş alacak hakkım olmağla hâlâ taleb ederim deyü da‘vâ eyledikde ol dahi cevâbında ber-vech-i muharrer ikrâr lâkin meblağ-ı bâkī-i mezkûr otuz guruşun yirmi guruşunu dahi kendiye edâ ve teslîm etmişidim deyü mikdâr-ı mezkûrda eylediği def‘ine ikāmet-i beyyine edemeyip bi’t-taleb mersûm Yorgi zimmîye yemîn teklîf olundukda ol dahi yemînden nükûl etmeğin mûcebince müdde‘î-i mersûm Yorgi zimmî yirmi guruş mütâlebesiyle bî-vech-i şer‘î mu‘ârazadan ba‘de’l-men‘ ikrârıyla lâzım gelen on guruşun müdde‘î-i mersûm Yorgi zimmîye edâsıyla mersûm Manol zimmî ilzâm olunduğu huzûr-ı âlîlerine i‘lâm olundu. Fî-gurreti Rebî‘ülâhir sene [1]221.