Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 827 Hüküm no: 1079 Orijinal metin no: [129b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belesan yağının Kudüs’ten değil Eçmiyazin Manastırı’ndan dağıtılması, Kudüs patrikliğinin bu işe karışmamasına dair hüküm kaydı Hâlâ Revan kurbunda Acem serhaddinde vâki‘ Üçkilise demekle ma‘rûf Eçmiyazin Manastır’da Ermeni tâifesi üzerlerine berât-ı âlîşân ile patrik ve kiragos olan Agop nâm râhib mahrûse-i Edirne’de Dersa‘âdet’ime arzuhâl edip ve mukaddemâ eline verilen hatt-ı hümâyûn-ı sa‘âdet-makrûn ile mu‘anven berât-ı âlîşân mûcebince bu âna değin âyinimiz üzre Eçmiyazin nâm manastırda başrâhib olanlar tarafından cümle memâlik-i Osmaniye ve gayrı memleketlere Eçmiyazin’den tevzî‘ olunur iken ve husûs-ı mezbûra âhardan kimesne dahl ve ta‘arruz eylemeyip mâni‘ olmayalar deyû berât-ı âlîşânda mastûr iken hâlâ Kudüs-i şerîfde Ermeni tâifesine âyinlerinde muhâlif yolu değil iken tegallüben patrik olan Agyazar nâm râhib mücerred Kudüs-i şerîfde patrik olmak için belesan yağı Kudüs-i şerîfden tevzî‘ olunmak üzre beher sene cânib-i mîrîye on dört bin akçe vermeğe iltizâm edip bir bölük fukarâya feth-i hâkānîden beri kifâf edegeldikleri sadakāt ve nüzûru kat‘ ettirip beş altı yüz fukarâya küllî gadr ve hayf eylemeğin feth-i hâkānîden beri cânib-i mîrîden bir şey verilegelmemekle zikr olunan on beş bin akçe ref‘ olunup hatt-ı hümâyûn-ı sa‘âdet-makrûn ile mu‘anven berât-ı âlîşânda tasrîh olunduğu üzre zikr olunan belesan yağı üslûb-ı sâbık üzre Eçmiyazin’den tevzî‘ ettirip min ba‘d Kudüs-i şerîf cânibinden belesan yağı tevzî‘ine kiragos dahl ve ta‘arruz ettirilmemek bâbında müceddeden berât-ı âlîşân ricâ eylemeğin hazîne-i âmiremde mahfûz olan defterlere nazar olundukda Kudüs-i şerîfde patrik ve nâzır olan Agyazar nâm râhib belesan yağı Kudüs-i şerîfde kendi pişirip tevzî‘ eylemek üzre her sene kendi malından cânib-i mîrîye on beşer bin akçe vermeğe ta‘ahhüd edip vech-i meşrûh üzre berât verildiği arz olundukda mukaddemâ ellerinde olan hatt-ı hümâyûn-ı sa‘âdet-makrûnum ile mu‘anven berât-ı şerîf vech-i meşrûh üzre belesan yağı mahall-i mezbûrda tevzî‘ oluna âhardan kimesneye dahl ve ta‘arruz ettirilmeyip mâni‘ olmayalar deyû mastûr ve müsarrah olmağın merkūm Agyazar nâm râhib cânib-i mîrîye olageldiği akçeyi vermeğe ta‘ahhüd etmekle belesan yağı Kudüs-i şerîfde tevzî‘ ettirmeğe hilâf-ı inhâ ile berât ettirdiği ecilden olagelmişe mugāyir merkūmlara gadr eylemekle zikr olunan on beş bin akçe ref‘ olunup fîmâ ba‘d bunlardan taleb olunmamak feth-i hâkānîden beri olagelene muhâlif vaz‘ ve hareket ve dahl ve ta‘arruz ettirilmemek üzre ellerinde olan berât-ı şerîfde olan kuyûd üzre ber mûceb-i hatt-ı hümâyûn-ı sa‘âdet-makrûn müceddeden berât-ı şerîf verilmek bâbında fermân-ı âlîşânım sâdır olmağla üslûb-ı sâbık üzre zikr olunan belesan yağı Eçmiyazin’den tevzî‘ olunmak üzre müceddeden bu berât-ı hümâyûn-ı izzet-makrûn verdim ve buyurdum ki mezbûr Agop varıp üslûb-ı sâbık üzre elinde olan hatt-ı hümâyûn-ı sa‘âdet-makrûn ile mu‘anven berât-ı âlîşânda tasrîh olunduğu üzre zikr olunan belesan yağı Eçmiyazin nâm mahalden üslûb-ı sâbık üzre tevzî‘ olunup ve mezbûr Agyazar nâm râhib cânib-i mîrîye her sene vermeğe ta‘ahhüd eylediği on beş bin akçe bu âna dek alına gelmemekle ref‘ olunup fîmâ ba‘d meblağ-ı mezbûr mezbûrlardan taleb olunmayıp feth-i hâkānîden beri olagelene muhâlif Kudüs-i şerîf patriği tarafından belesan yağı tevzî‘ine ve patrikliğine mezbûr Agyazar’ı ve âharı bir vech ile dahl ve ta‘arruz ettirilmeyip mâni‘ ve müzâhim olmayalar, şöyle bileler, alâmet-i şerîfime i‘timâd kılalar. Tahrîren fî gurreti şehri Şa‘bâni’l-mu‘azzam li sene seb‘a ve seb‘în ve elf. Be-makâm-ı Edirne.