Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 163 Hüküm no: 176 Orijinal metin no: [16a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin şerbethanede unuttuğu Mısır altınlarını aldığı iddiasıyla Şerbetçi Petro aleyhine açtığı davada iddiasını ispat edemediği Mustafa Beşe b. İslâm nâm kimesne Galata’da mahfil-i kazâda şerbetçi esnâfından Petro v. Nikola zimmî muvâcehesinde ben târih-i i‘lâmdan on iki gün mukaddem mersûm Petro zimmînin Galata’da Odunkapı kurbünde mütemekkin olduğu asmalı şerbethânesinde bir örme kîse derûnunda mevzû‘ dört yüz doksan beş guruş kıymetli doksan dokuz aded Mısır altınlarımı sehven şerbethâne-i merkūme derûnunda kalmağla mersûm Petro zimmî bi-gayr-ı hak ahz etmekle istirdâd ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsına ikāmet-i beyyine edemeyip bi’t-taleb mersûm Petro zimmî müdde‘î-i mezbûr muvâcehesinde vech-i şer‘î üzere tahlîf olunmağın mûcebince müdde‘î-i mezbûr da‘vâ-yı mezkûresiyle mersûm Petro zimmîye bilâ-beyyine mu‘âraza[dan] men‘ olunduğu bi’l-iltimâs [huzûr-ı âlîlerine i‘lâm olundu.] Fî 8 R sene [1]221.