Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 164 Hüküm no: 177 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanan Kurşunlu Mahzeni’ndeki yağcı esnafının ihtiyaçlarına uygun şekilde dükkanlarını yeniden yapmalarına izin verilmesi için istida verdikleri Mahrûse-i Galata Yağ Kapanı’nda sâkin yağcı esnâfından Korucuoğlu Hasan ve Gözleveli es-Seyyid Ahmed ve es-Seyyid el-Hâc Ahmed Reis ve Vekîlharc el-Hâc Ahmed ve el-Hâc Yusuf ve Paşa Ahmed ve es-Seyyid Mehmed ve şerîki el-Hâc Ali ve Tütüncü el-Hâc Mehmed ve Kasımpaşalı Mehmed Emin ve Soğancıoğlu el-Hâc Ahmed ve el-Hâc Mehmed Salih ve Araboğlu el-Hâc Ahmed ve Kasab Mehmed ve el-Hâc Hâfız Mehmed ve el-Hâc Hasan oğlu Mehmed Emin ve el-Hâc Ömer ve el-Hâc Ali ve el-Hâc Abdurrahman ve Mehmed Emin Efendi ve el-Hâc Mustafa ve Sarracbaşı Mustafa ve Salih Efendi mahrûse-i mezbûrede meclis-i şer‘-i münîrde esnâf-ı merkūme nâzırı Hasan Ağa hâzır olduğu hâlde herbiri ifâde-i merâm edip bundan akdem bi-kazâillâhi te‘âlâ vukū‘-yâfte olan Kurşunlu Mahzeni harîkinde sâkin olduğumuz yirmi iki aded yağcı dükkânları muhterik olup arsa-yı sırfa kalmağla bizim bey‘ u şirâ eylediğimiz eşyânın ekseri erzâk makūlesinden olup Dârü’s-saltanatü’l-aliyye’de ve civârında kâin bilâd-ı selâse-i mu‘azzamada sâkin ibâdullâha eşedd-i lüzûmu olan zehâirin cüz’-i a‘zamı olduğu ecilden vaktiyle cem‘ ve tedârük lâzıme-i hâlden olmağla binâen-aleyh bazılarımızı bu esnâda dükkân binâsına tergīb ve âhardan istidâne ile mutasarrıf olduğu dükkânı kadîmî üzere fevkinde eşyâ vaz‘ olunacak odasıyla ma‘an binâ ve inşâya mübâşeret eyledikde bu esnâda dükkân üzerinde bî-kâr odası ihdâsı memnû‘ olunup lâkin mâ-takaddemden beri bizim dükkânlarımız emvâl ve eşyâ vaz‘ ve hıfz için kadîm üzere bir oda binâsına muhtâc olup binâ olunduğu takdîrce dahi derûnunda âdem iskân olunan bî-kâr odası misilli binâ olunmayıp ber-vech-i meşrûh eşyâ vaz‘ı’çün kadîmî üzere dükkân içinde nerdübân ile çıkılıp ve inilip dükkân hâricinde nerdübânı ve müstakil oda kapısı olmayıp ber-vech-i mübeyyen derûnuna ancak eşyâ vaz‘ ve hıfz olunup esnâfdan ve gayrıdan gerek müte’ehhil ve gerek mücerred ferd-i vâhid iskân olunmamak üzere herbiri âhara ve nâzırları hâzır-ı mezbûr dahi cümlesine tekeffül ve bu vechile ta‘ahhüd-birle izin ve ruhsatı hâvî fermân-ı âlîleri sudûrunu bi-ecmâ‘ihim istirhâm ve istid‘â-yı inâyet etmeleriyle bu sûretde madde-i mezkûre sınıf-ı âhara sirâyet etmemek şartıyla esnâf-ı merkūmenin istid‘âlarına müsâ‘ade re’y-i rezîn-i âsafânelerine menût mevâddan idüğü bi’l-iltimâs huzûr-ı adâletlerine i‘lâm olundu. Fî 11 Rebî‘ülâhir sene [1]221.