Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 165 Hüküm no: 178 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aksabet bt. Magdar’ın uygunsuz hareketlerinden dolayı mahalleden çıkarılmasından kocası Çizmeci Nikogos’un kefil olması üzerine vazgeçildiği Mahrûse-i Galata hâricinde Kamer Hatun Mahallesi ahâlîsinden ashâb-ı arzuhâl Kuyumcu Serope v. Mıgırdıç ve Kavukcu Agop v. Arakil ve Sâ‘atçi Tomas v. Corci ve Kuyumcu Abraham v. Kigork ve İplikçi Markar v. Mıgırdıç ve Sâ‘atçi Anton v. Nataki ve Suhûfcu Melkon v. Bogos ve Kuyumcu Artin v. Ohannes ve Kuyumcu Kirkor v. Serope ve Kuyumcu Ohannes v. Nikogos ve Hayyât Karabet v. Serkiz ve Hayyât Agop v. Zaruf nâm zimmîler mahrûse-i mezbûrede meclis-i şer‘de mahalle-i mezbûre ahâlîsinden olup husûs-ı âtîde nefsinden asîl ve zevcesi Aksabet bt. Magdar Nasrâniye tarafından ber-vech-i câ’î vekîl olduğu şahsını ârifân Bıçakçı Koğas v. Hadros ve Enserci Anparson v. Agop zimmîler şehâdetleriyle sâbit olan derûn-ı arzuhâlde mesfûru’l-ism Çizmeci Nikogos v. Sahak zimmî muvâcehesinde mahalle-i mezbûre imâmı Mustafa Efendi hâzır olduğu hâlde herbiri takrîr-i kelâm ve ifâde-i merâm edip zevcân-ı mersûmân mahallemiz ahâlîsinden olup lâkin zevcesi müvekkile-i mersûme Aksabet Nasrâniye kendi hâlinde olmayıp hadîdetü’l-lisân bî-edeb olmağla zevci mesfûrun dahi zevcesi müvekkile-i mesfûreyi muhâfaza ve tehdîd ve terbiyeye adem-i kudreti zâhir olduğu ecilden dâimâ bizi ve ıyâl ü evlâdımızı bilâ-mûcib ta‘cîz ve tekdîr eylediğinden gayrı herbirimize bir töhmet isnâd eylediği hetk-i ırzı mûcib akvâl-i kâzibesine akrân [ve] emsâlimiz miyânında sabır ve tahammüle mecâl muhâl olmağla cümlemiz müvekkile-i mesfûrenin evzâ‘ ve etvârından hoşnûd ve râzı değiliz deyü teşekkî ve mahalle-i mezkûreden hurûclarına istid‘â eylediklerinde mesfûr Çizmeci Nikogos zimmî dahi cevâbında zevcesi müvekkile-i mersûmenin ber-vech-i meşrûh hadîdetü’l-lisân olduğunu ikrâr lâkin bundan böyle zevcesi mersûmeyi hilâf-ı şer‘ hareketde olursa men‘ ve tedîbe muktedir olduğunu ifâde [ve] iş‘âr-birle beynlerinde ba‘de vukū‘ı’l-münâza‘a ve bâ-vesâtet-i muslihîn beynleri ıslâh olunup mersûm Nikogos zimmî zevcesi mersûmenin fîmâ-ba‘d ahâlî-i mezkûreyi bi-gayr-ı vechin ta‘cîz ve tekdîr etmemek üzere nefsine ve hîn-i mütâlebede meclis-i şer‘a ihzârına kefîl oldukda müdde‘ûn-ı ahâlî-i mahalle-i mezkûre dahi kefâlet-i merkūmeyi kabûl ve ber-vech-i meşrûh da‘vâ ve teşekkîde beni tehîr eylediklerinden mâ‘adâ ahâlî-i merkūme dahi zevcân-ı mersûmâna bilâ-mûcib müdâhale etmemeğe ta‘ahhüd ve herbiri âhara tekeffül edip bu vechile beynleri tevfik ve ıslâh olunup kat‘-ı münâza‘a eyledikleri tescîl ve mübâşirleri Mustafa Çavuş kulları yediyle huzûr-ı âlîlerine i‘lâm olundu. Fî 3 R sene [1]221.