Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 167 Hüküm no: 183 Orijinal metin no: [17a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Direkci İsmail Alemdâr ile oğulları Mehmed Emin ve Mustafa’nın alacak verecek hususunda Fransa beratlılarından Apostol Papa v. İstemat’ın zimmetini ibra ettikleri Zikri âtî husûs için bi’t-taleb Galata Bâb Mahkemesi’nde me’zûnen mürsel Kâtib es-Seyyid İsmail Efendi dâ‘îleri Galata hâricinde Sarı Lütfü Mahallesi’nde vâki‘ Françe Baştercümânı Françesko Frankini’nin mütemekkin olduğu menzile varıp huzûr-ı Müslimînde akd-i meclis-i şer‘-i âlî ettikde sâhib-i arzuhâl Direkci İsmail Alemdâr b. Abdullah b. “Abdülmennan nâm kimesnenin sulbî kebîr oğlu ve tarafından ber-vech-i âtî vekîl olduğu es-Seyyid eş-Şeyh Ali Efendi b. Mustafa ve Kahveci Ali Beşe b. Ali şehâdetleriyle sâbit olan Mehmed Emin nâm kimesne meclis-i ma‘kūd-ı mezkûrda Françe berâtlılarından derûn-ı arzuhâlde mersûmü’l-ism Apostol Papa v. İstemat muvâcehesinde müvekkil-i merkūmun âhar oğlu sâhib-i arzuhâl Mustafa ile baştercümân-ı mesfûr hâzır oldukları hâlde ben târih-i i‘lâmdan iki sene mukaddem li-ecli’t-ticâre Bahr-ı siyah’da vâki‘ Kalas kasabasında sâkin iken tüccârdan kasaba-i mezbûre mütemekkinlerinden gāib ani’l-beled Yani Brastanoz nâm tâcir yedinden ve mâlından bi-tarîkı’l-poliçe bin beş yüz guruş kabz eylediğimde dâyinim tâcir-i mersûmu deyn-i mezkûrum <> ile Âsitâne’de sâkin babam müvekkilim mezbûr İsmail Alemdâr üzerine kabûlüne mevkūfe gıyâbında havâle ve yedine poliçe kâğıdı tâ‘bir olunur havâleyi müş‘ir deyn temessükü verdiğimden sonra tâcir-i mersûm dahi temessük-ı merkūmu ahz ve meblağ-ı merkūmu babam müvekkilim mezbûr İsmail Alemdâr’dan kasaba tarafından gāib ani’l-beled Risi Taviti nâm tâciri tevkîl ve poliçe temessüğünü yedine teslîm ve lede’l-iktizâ âharı tevkîle me’zûn eyledikde ol dahi ba‘de kabûli’l-vekâle Âsitâne’ye gelmek üzere iken Boğdan tarafına azîmetim iktizâ edip ol dahi ber-vech-i muharrer âharı tevkîle me’zûn olduğu ecilden mârru’z--zikr diyâr-ı Boğdan’da mütemekkin olduğu hâlde Âsitâne’de mütemekkin mersûm Apostol Papa’yı ber-vech-i mübeyyen tevkîl edip mesbûku’z-zikr benim verdiğim poliçe temessüğünü irsâl ol dahi vekâleti kabûl ve temessük-ı merkūmu ahz edip babam müvekkilim mezbûr İsmail Alemdâr’a havâle-i mezkûreyi i‘lâm ve temessük-ı merkūmu teslîm eyledikde babam müvekkilim mezbûr dahi havâle-i mezkûreyi kabûl ve temessük-ı merkūmu ahz ve meblağ-ı mezkûru tamamen teslîm etmişidi el-hâletü hâzihî babam müvekkilim mezbûr İsmail Alemdâr havâle-i mezkûreyi kabûlüne nâdim ve pişmân olmağla bi-tarîkı’l-havâle medfû‘u olan meblağ-ı mezkûru istirdâd ederim deyü bi’l-vekâle tasaddî [eylediğim] da‘vâ-yı mezkûrem meşrû‘a olmadığı bana ba‘de’t-tefhîm mersûm Apostol babam müvekkilim mezbûrun hâline mürüvveten makbûzu olan bin beş yüz guruşun yedi yüz guruşunu babam müvekkilim mezbûr için bana teberru‘an def‘ ve teslîm eyledikde ben dahi babam müvekkilim mezbûr için bi’l-vekâle ahz u kabz edip ehadühümânın âhar ile kat‘â da‘vâ ve nizâ‘ı kalmayıp târih-i i‘lâma gelince beynimizde cârî hukūk-ı şer‘iyyeye müte‘allika da‘vâdan ben mersûm Apostol Papa’nın zimmetini bi’l-asâle ve bi’l-vekâle ve karındaşım hâzır-ı mezbûr Mustafa dahi bi’l-asâle ibrâ ve iskāt eylediğimizde ol dahi ibrâ-i merkūmu kabûl ve bu vechile kat‘-ı münâza‘a eyledik deyü ikrâr ve tasdîkleri kâtib-i mezbûr mahallinde tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri tescîl ve huzûr-ı âlîlerine i‘lâm olundu. Fî 12 Rebî‘ülâhir sene [1]221.