Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 170 Hüküm no: 187 Orijinal metin no: [17b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Süleyman’ın kendisini câriyesi ile birlikte dövdüğünü iddia ettiği Naile bt. Hüseyin aleyhine açtığı davada on beş guruşa sulh olduğu Galata hâricinde Şahkulu Mahallesi’nde sâkine ve zâtı mu‘arrefe Zeyneb bt. Süleyman nâm hatun Galata Bâb Mahkemesi’nde meclis-i şer‘de yine mahalle-i mezbûrede sâkine Nâile bt. Hüseyin b. Satır [Şatır] el-Hâc Ali nâm hatunun babası ve tarafından husûs-ı âtîde vekîl olduğu zât-ı mezbûreyi ârifân Hasan Ağa b. Ali ve İsmail Ağa b. Abdullah nâm kimesneler şehâdetleriyle sâbit olan mezbûr Hüseyin nâm kimesne muvâcehesinde müvekkile-i mezbûre Nâile Hatun ile câriyesi gāibe ani’l-meclis Rûşen bt. Abdullah nâm Zenciye târih-i i‘lâmdan bir gün mukaddem mahalle-i mezbûrede vâki‘ sâkine oldukları menzilinde yumruk ile beni bi-gayr-ı hak darbetmeleriyle mûcib-i şer‘îsini hâlen taleb [ederim] deyü tasaddî eyledim, da‘vâmdan bâ-tavassut-ı muslihîn vekîl-i mezbûr Hüseyin ile an-inkâr on beş guruş bedel-i makbûza ba‘de’s-sulh ve’l-kabûl husûs-ı mezkûra ve bedel-i sulh-ı mezkûr on beş guruşa müte‘allika da‘vâdan herbirimiz bi’l-asâle ve bi’l-vekâle âharın zimmetini ibrâ ve iskāt ve herbirimiz ber-vech-i muharrer âharın ibrâsını kabûl edip bu vechile kat‘-ı nizâ‘ eyledik deyü ikrâr ve tasdîkleri tescîl ve bi’[l]-iltimâs huzûr-ı âlîlerine i‘lâm olundu. Fî 15 R sene [1]221.