Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 170 Hüküm no: 188 Orijinal metin no: [17b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vârisleri tarafından Emine Hanım’ın vefâtına sebep oldukları iddiasıyla Hâfız Hacı Mehmed, Emetullah ve kızı Emine aleyhine açtıkları diyet davasının haklı olmadığı Mahrûse-i Galata’da el-Hâc A‘mâ Mahallesi’nde sâkine iken bundan akdem vefât eden Emine bt. Abdurrahman’ın verâseti sâhibey-i arzuhâl zevci Ahmed b. Mehmed ile anası Rukiye bt. İsmail ve li-üm kız karındaşları Şerife Hadice ve Şerife Fâtıma bintey es-Seyyid Numan’a inhisârı tahakkukundan sonra husûs-ı âtîde kendi nefsinden asâleten ve sadriye kebîre kızları mezbûretân Şerife Hadice ve Şerife Fâtıma taraflarından vekîl olduğu zâtlarını ârifân Ahmed b. Ali ve Mehmed b. Hüseyin şehâdetleriyle zâhir olan mezbûre Rukiye Hatun ile zevc-i mezbûr Ahmed Galata Mahkemesi’nde meclis-i şer‘-i münîrde derûn-ı arzuhâlde isimleri mezkûr Çeşme Meydanı’nda Yeşildirekli Hamamcısı Hâfız el-Hâc Mehmed b. el-Hâc Ahmed ve mahalle-i merkūmede sâkine ve zâtı mu‘arrefe Emetullah bt. Osman ve mezbûre Emetullah Hatun’un kızı Emine bt. Mustafa’nın zevci ve tarafından husûs-ı câ’i’z-zikrde vekîl olduğu zâtını ârifân Hasan b. Süleyman ve Mustafa b. Mustafa şehâdetleriyle sâbit olan Mehmed b. İsmail muvâcehelerinde bundan akdem mârru’z--zikr el-Hâc A‘mâ Mahallesi’nde vâki‘ mutasarrıf olduğum menzilde kızım müteveffât-ı mezbûre ile bi’l-ma‘iyye sâkine iken menzil-i mezkûr derûnunda bi-kazâillâhi te‘âlâ harîk zuhûr edip der-akab def‘ olundukda otuz gün mürûrunda mezbûrûn Hâfız el-Hâc Mehmed ve Rukiye ve müvekkile-i mezbûre Emine Hatun kızım mûrise ve müteveffât-ı mezbûreye sizin sâkine olduğunuz menzilde harîk zuhûr etmekle ba‘de’l-yevm âteşi muhâfaza edin zîrâ ma‘âzallâh bir def‘a dahi zuhûr etmek lâzım gelir ise zâbitân sizi habs ve tedîb eder deyü nush eylediklerinden sonra kızım mezbûre hasta ve sâhibe-i firâş olduğu hâlde vefât etmişidi bu sûretle kızım mezbûre câiz ki ber-vech-i meşrûh mezbûrûnun kelâmlarından korkup vefât etmiş olmağla diyetini bi’l-verâse taleb ederim deyü tasaddî eyledikleri da‘vâları takrîr-i meşrûhları üzere meşrû‘a ve iltifâta şâyân olmadığı kendilere tefhîm-birle mezbûrûn Hâfız Mehmed ve Rukiye ve Emine hatunlara suâl dahi teveccüh etmeyip müdde‘iyân-ı mezbûrân da‘vâ-yı mezkûreleriyle mezbûrûna bî-vech mu‘ârazadan men‘ olundukları mübâşirleri Çukadâr Ebûbekir yediyle huzûr-ı âlîlerine i‘lâm olundu. Fî 15 R sene [1]221.