Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 172 Hüküm no: 191 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasil v. Nikola’nın alacağına kefaletinden dolayı Yani v. Nikola’dan iki yüz guruş alacağı olduğu Bağçevan Vasil v. Nikola nâm zimmî Galata Bâb Mahkemesi’nde meclis-i şer‘de Galata’da mütemekkin Kebeci Yani v. Nikola nâm zimmî muvâcehesinde mersûm Yani zimmînin babası gāib ani’l-meclis Nikola v. Yani zimmî zimmetinde Rûmiyyü’l-ibâre işbu bir kıt‘a deyn temessüğü mantûkunca cihet-i karzdan alacak hakkım olan iki yüz guruşa oğlu mersûm Yani bi’l-emr ve’l-kabûl kefîl ve zâmin olmağla mebî‘-i mezkûr iki yüz guruşu oğlu mersûm Yani zimmîden bi-hükmi’l-[kefâ]le taleb ederim deyü da‘vâ eyledikde ol dahi cevâbında husûs-ı mezkûru bi-tamâmihî tâyi‘an ve kat‘iyyen ikrâr u i‘tirâf etmeğin alâ-mûcibi ikrârihi meblağ-ı mezkûr iki yüz guruşu müdde‘î-i mersûm Vasil zimmîye bi-hükmi’l-kefâle edâya mesfûr Yani zimmî ilzâm olunduğu bi’[l]-iltimâs huzûr-ı âlîlerine i‘lâm olundu. Fî 18 R sene [1]221.