Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 829 Hüküm no: 1081 Orijinal metin no: [130a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tekâlif vermemek için haham olanların azli gerektiğinden İsrail’in hahamlıktan feragat ettiği Dergâh-ı âlî -dâme mahfûfen bi’l-me‘âlî- çavuşlarından Mustafa Çavuş b. Hüseyin nâm kimesne meclis-i şer‘-i şerîfde Yahud tâifesinin Portakal ve Kasdariye cemâ‘atlerinin hahamları olan bâ‘isü’s-sifr İsrail v. Elyazer nâm Yahudi muvâcehesinde ikrâr ve takrîr-i kelâm edip Yahudi tâifesinden ba‘zı zî-kudret olanlar mücerred tekâlîf vermemek için biz haham olduk deyû sâir Yahudileri rencîde etmeleri ile hâlâ tâife-i mezbûrenin hahamları olanlar ref‘ ve azl olunup cemâ‘atbaşı olmayalar deyû emr-i şerîf-i cihân-mutâ‘ vârid olmağın ve mezbûr İsrail imtisâlen li’l-emri’l-âlî hahamlıkdan ferâgat edip dest-i hat ta‘bîr olunur hahamlık temessükünü işbu meclisde bana teslîm ben dahi alıp hark ettiğimden sonra mezbûr İsrail sâir Yahudiler gibi ba‘de’l-yevm tekâlîf-i örfiyye vermeğe ta‘ahhüd eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah Kethüdâ-yı muhzırân, Şükrullah Bey b. Mustafa, Abdi Çelebi b. Hüseyin, Hasan Çelebi b. Ahmed.