Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 830 Hüküm no: 1082 Orijinal metin no: [130b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahin ve İbrahim’in ölen Hüseyin b. Lütfullah’ın vârisleri olduğu, el konulan muhallefatın bunlara verilmesi Bi’l-fi‘l vilâyet-i Rumeli’nde Kilis sancağında Akhisar kadısı olan el-Hâc Ahmed Efendi b. Behram b. Abdullah kıbelinden hat ve hatmi hâvî bin yetmiş yedi Ramazânı’nın on üçüncü günü ile müverrah Hasan Efendi b. Ömer Efendi yediyle nakl-i şer‘î vârid olup mazmûnu Klis sancağında Akhisar kazâsı müzâfâtından kasaba-i Nevâbâd-ı kebîrde el-Hâc Yusuf mahallesinde [sâkin] iken vefât eden Hüseyin b. Lütfullah’ın sagīr oğulları Şahin ve İbrahim’in tesviye-i umûru için kıbel-i şer‘den mansûbe vasîleri ve vâlideleri olan Kerime bt. Abdünnebi nâm hâtundan da‘vâ-yı sahîha-i şer‘iyye ile mesbûk istişhâd-ı şer‘î sudûrundan sonra mahalle-i mezbûre sükkânından Ahmed Efendi b. Hasan b. Abdurrahman ve Sâlih Efendi b. el-Hâc Hüseyin b. el-Hâc Mustafa nâm kimesneler nakl ve tahvîl için ve mahall-i cerh ve ta‘dîlde edâ-i şehâdet-i şer‘iyye edip fi’l-asl mahalle-i mezkûre ahâlîsinden olup bundan akdem mahmiye-i İstanbul’da ( ) mahallesinde sâkin iken vefât edip vârisi olmamak zu‘mu ile terekesi emîn-i beytülmâl yedinde mazbûta olduğu mesmû‘umuz olan Halil Bey b. Lütfi ile müsteşhide-i mezbûrenin vasîsi olduğu sagīrân-ı mezbûrânın babaları mezbûr Hüseyin li ebeveyn karındaşları olup babaları ismi Lütfullah b. Kurt Ali ve anaları ismi Emine ve maskat-ı re’sleri karye-i mezbûredir, müteveffâ-yı mezbûrun usûbet-i nesebiyye cihetinden verâseti sagīrân-ı mezbûrâna münhasıradır, gayrı vârisi ve terekesine müstahıkk-ı âhar olduğu ma‘lûmumuz değildir, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle oldukdan [sonra] müsteşhide-i mezbûre müteveffâ-yı mezbûr Halil Bey’in terekesini vâzı‘ü’l-yed olanlardan taleb ve da‘vâ ve ahz u kabza ve kendilere îsâle ve ahz u kabz ve îsâl mütevakkıf olduğu umûrun küllîsine tarafından nâkilü’l-kitâb Hasan Efendi b. Ömer Efendi nâm kimesneyi vekîl ve menâbına nâib nasb ve ta‘yîn edip ol dahi vekâlet-i mezbûreyi kabûl ve merâsimini edâya ta‘ahhüd ettiğini hâvî bulunmağın kitâb-ı mezbûr nâkil-i mezbûr Hasan Efendi talebi ile müteveffâ-yı mezbûr Halil Bey’in vech-i mübeyyen üzre terekesine vâzı‘ü’l-yed olup şıkk-ı evvel defterdârı kāimmakāmı olan Emîrü’l-ümerâ’i’l-kirâm Mehmed Paşa mahzarında dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i âlîde feth ve kırâat ve istintâk olundukda mûmâ-ileyh Mehmed Paşa müteveffâ-yı mezbûrun terekesine vech-i mübeyyen üzre vaz‘-ı yedini ikrâr mâ‘adâsını inkâr etmeğin mezbûr Hasan Efendi’den kitâb-ı mezbûr hâlâ kazâ-i mezbûre kadısı olan mûmâ-ileyh el-Hâc Ahmed Efendi’nin kıbelinden vârid kitâbı ve zeylinde olan hat ve hatmi dahi hat ve hatmi olduğuna beyyine taleb olundukda zeyl-i hüccetde isimleri terkīm olunup yol şâhidleri olan Ali b. Veled ve Zülfikār b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka kitâb-ı mezbûru hâlâ kazâ-i mezbûre kadısı olan el-Hâc Ahmed b. Behram b. Abdullah bizim üzerimize kırâat edip huzûrumuzda imzâ ve mühürleyip hat ve hatmine bizi işhâd eyledi, biz kitâb-ı mezbûr mûmâ-ileyh Hacı Ahmed Efendi’nin kıbelinden vârid kitâbı ve zeylinde olan hat ve hatmi dahi mûmâ-ileyh Ahmed Efendi’nin hat ve hatmi olduğuna şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olup mûcebince sagīrân-ı mezbûrânın vech-i muharrer üzre verâsetlerine ve müdde‘î-i mezbûr Hasan Efendi’nin vekâletine hükm olunup müteveffâ-yı mezbûr Halil Bey’in terekesini mezbûr Hasan Efendi’ye teslîme mûmâ-ileyh Mehmed Paşa’ya tenbîh olunmağın mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Şevvâli’l-mükerrem li sene seb‘a ve seb‘în ve elf Şuhûdü’l-hâl: Umdetü erbâbi’t-tahrîr ve’l-kalem Ebûbekir Efendi Tezkireci-i evvel, zahrü erbâbi’t-tahrîr ve’l-kalem Mustafa Efendi Tezkireci-i sânî, fahrü’l-emâsil ve’l-akrân İsmail Ağa Serçavuşân, umdetü’l-a‘yân Eyüb Ağa Kethüdâ-yı Hazret-i Efendi, fahrü’l-akrân Şaban Ağa b. Süleyman Ser-muhzırân.