Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 174 Hüküm no: 196 Orijinal metin no: [18a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Françelü Natal v. Markol’un francala bedelinden Francalacı Mihal v. Kostantin aleyhine açtığı alacak davasında iki yüz yirmi guruşa sulh olduğu Françelü Natal v. Markol nâm müste’men Galata Bâb Mahkemesi’nde meclis-i şer‘de sâhib-i arzuhâl Francalacı Mihal v. Kostantin zimmî muvâcehesinde Françe Baştercümânı Françesko Frankini tarafından Kapıoğlanı Kirkor hâzır olduğu hâlde mersûm Mihal zimmî zimmetinde Rûmiyyü’l-ibâre deyn temessüğü mantûkunca francala tâ‘bir olunur ma‘lûmü’l-vezn semeninden üç yüz on guruş alacak hakkım olmağla hâlâ taleb ederim deyü tasaddî eylediğim da‘vâmdan bâ-tavassut-ı muslihîn mersûm Mihal zimmî ile iki yüz yirmi guruşa ba‘de’s-sulh ve’l-kabûl bedel-i sulh-ı mezkûrdan mâ‘adâ doksan guruşa müte‘allika da‘vâdan mersûm Mihal zimmînin zimmetini ba‘de’l-ibrâ ve’l-kabûl ibrâdan müstesnâ bedel-i sulh-ı mezkûr mersûm Mihal zimmî zimmetinde kalmağla hâlâ taleb ederim deyü ba‘de’d-da‘vâ ve’s-suâl ve’l-ikrâr alâ-mûcibi ikrârihi bedel-i sulh-ı mezkûr iki yüz yirmi guruşun müdde‘î-i mesfûr Natal müste’mene edâ ve teslîmiyle mersûm Mihal zimmî ilzâm olunduğu mübâşirleri el-Hâc Mehmed Çavuş mübâşeretiyle huzûr-ı âlîlerine i‘lâm olundu. Fî 20 R sene [1]221.