Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 174 Hüküm no: 197 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamal Serkiz v. Marat’ın kefaletinden dolayı alacağı olduğu iddiasıyla Lusye bt. Anparson aleyhine açtığı davada iddiasını ispat edemediği Hamal Serkiz v. Marat zimmî Galata’da mahfil-i kazâda şahsı mu‘arrefe Lusye bt. Anparson Nasrâniye muvâcehesinde mersûm Lusye Nasrâniye zimmetinde cihet-i kefâletden bâ-i‘lâm-ı şer‘î mahkûmün-bih dokuz yüz guruşdan bâkī yedi yüz yetmiş guruş alacağım olmağla hâlâ taleb ederim deyü da‘vâ eyledikde ol dahi cevâbında ber-vech-i muharrer ikrâr lâkin meblağ-ı bâkī-i merkūm yedi yüz yetmiş guruşu dahi ceste ceste kendiye teslîm ol dahi tamamen tesellüm ve ahz eyledikden sonra işbu bir kıt‘a ibrâ hücceti mantûkunca mahrûse-i mezbûre muzâfâtından Tophane Mahkemesi’nde nâibü’ş-şer‘i’l-kavîm olan müderrisîn-i kirâmdan Uşşakī el-Hâc İsmail Efendi huzûrunda ber-vech-i muharrer meblağ-ı bâkī-i merkūm yedi yüz yetmiş guruşu ceste ceste kabz edip meblağ-ı mezbûrdan benim zimmetimde bir akçe bâkī kalmadığını ikrâr u i‘tirâf husûs-ı mezkûra ve târih-i hüccet-i merkūmeye gelince bi’l-cümle hukūk-ı şer‘iyyeye müte‘allika da‘vâdan benim zimmetimi ibrâ ve iskāt ben dahi mesfûru ikrârında tasdîk ve ibrâsını kabûl etmişidim deyü işbu sene Rebî‘ülâhir’in yedinci günü tarihiyle müverraha ve nâib-i mûmâ-ileyhin imzâ ve hatemini havîye hüccet-i merkūmeyi ibrâzıyla ba‘de’d-def‘ ve’l-inkâr dâfi‘a-i mersûme ber-vech-i muharrer def‘-i mezkûrunu zeyl-i hüccetde isimleri mastûr ve lede’t-tezkiye adâletleri zâhir Mehmed Nuri b. Mustafa ve İsmail b. Ahmed şehâdetleriyle muvâcehesinde vech-i şer‘î üzere isbât etmeğin mûcebince müdde‘î-i mersûm Serkiz zimmî da‘vâ-yı mezkûresiyle mesfûre Lusye Nasrâniye bî-vech-i şer‘î mu‘ârazadan men‘ olunduğu bi’[l]-iltimâs huzûr-ı âlîlerine i‘lâm olundu. Fî 15 R sene [1]221.