Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 175 Hüküm no: 198 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma Hatun’un eski kocası Giritli İbrahim’den kırk iki guruş alacağını tahsil ettiği Galata’ya muzâfe kasaba-i Tophane’de Ekmekçibaşı Mahallesi’nde sâkine Şerife Fâtıma bt. es-Seyyid İbrahim nâm hatunun vâlidesi ve tarafından ber-vech-i âtî vekâleti zâtını ârifân İmâm es-Seyyid el-Hâc Halil Efendi b. Mehmed ve Manav Hasan b. Ahmed şehâdetleriyle sâbit olan zâtı mu‘arrefe Şerife Ümmügülsüm bt. el-Hâc Osman nâm hatun Galata Bâb Mahkemesi’nde meclis-i şer‘de müvekkile-i mezbûrenin zevc-i sâbıkı Giridî İbrahim b. Ali nâm kimesne muvâcehesinde mezbûr Giridî İbrahim müvekkilem kızım mezbûrenin zevc-i dâhili iken târih-i i‘lâmdan on sekiz ay mukaddem müvekkilem kızım mezbûreyi tatlîk etmekle zimmetinde mütekarrir ve ma‘kūdun-aleyh olan yüz bir guruşu taleb ederim deyü tasaddî eylediğim da‘vâmdan mezbûr ile bi’l-vekâle altmış guruşa ba‘de’s-sulh ve’l-kabûl mâ‘adâya ve ibtidâ-yı zevciyyetden târih-i i‘lâma gelince bi’l-cümle beynlerinde cârî hukūk-ı sâire-i şer‘iyyeye müte‘allika da‘vâdan mezbûrun zimmetini bi’l-vekâle ba‘de’l-ibrâ ve’l-kabûl bedel-i sulh-ı mezkûrun on sekiz guruşu müvekkilem mezbûrenin zevc-i sâbıkı mezbûra semen-i mebî‘den deyni olan on sekiz guruşa takās ve mahsûben fürûnihâde ve bâkī kırk iki guruşu işbu meclis-i şer‘de müvekkilem mezbûre için bana def‘ u teslîm ben dahi yedinden ahz u kabz eyledim deyü ikrâr ve tasdîkleri tescîl ve huzûr-ı âlîlerine i‘lâm olundu. Fî 20 R sene [1]221.