Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 177 Hüküm no: 203 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tophane’deki debbağ esnafının şikâyet ve talebi üzerine Yahûdi Yuda v. Yuda’nın elindeki derileri kendilerine satmaya razı olup nizama aykırı hareket etmemeye söz verdiği Galata’ya muzâfe kasaba-i Tophane’de kâin debbâğ esnâfının kethüdâları Mehmed Ağa ve yiğitbaşı Hüseyin Ağa ve Yedikule debbâğ esnâfının kethüdâları Mustafa Ağa ve esnâf-ı mezkûre ustalarından Ali Ağa ve Üsküdarlı Hâfız Mehmed Efendi ve Mustafa Ağa ve el-Hâc Osman Ağa ve Ali Efendi ve sâir <> [mazbûtü]’l-esâmî ustalar Galata Bâb Mahkemesi’nde meclis-i şer‘de ihzâr eyledikleri Galata’da mütemekkin Yuda v. Yuda nâm Yahûdi muvâcehesinde biz Ayasofya-i kebîr ve Kılıç Ali Paşa Vakfı musakkafâtından kasaba-i Tophane’de kâin debbâğhânede sâkin debbâğ ustalarından olup <> yedimizde olan tuğra-yı garrâ ile mu‘anven ve muvaşşah fermân-ı âlî nâtık olduğu üzere debbâğhâne-i mezkûre hudûdu dâhilinde vâki‘ selhhânelerde zebh olunan öküz ve inek ve camus ve koyun ve kuzu ve keçi derileri emti‘a-i mahsûsamızdan olmağla kasab ustaları sayf ve şitâda râyic-i vakt üzere bize bey‘ biz dahi ba‘de’l-iştirâ beynimizde tevzî‘ ve debâgat eylediğimizden sonra Tersâne-i âmire ve Cebehâne-i ma‘mûre taraflarına iktizâ eden meşîn ve kavsele ve tirşeyi vakt ü zamânıyla cânib-i mîrîye tediye ve teslîm ve mâ‘adâsını ibâdullaha bey‘ edip nizâm-ı kadîmimiz vech-i meşrûh üzere cârî olmağın âharın bey‘ u şirâsı min-külli’l-vücûh memnû‘ iken Yahûdi-i mersûm yedinde mevcûde olan dokuz aded öküz derilerini gālî bahâ ile iştirâ edip âhar mahalle nakl ve bey‘ dâ‘iyesinde olmağla nizâmımızın ihtilâline bâ‘is ve ber-minvâl-i muharrer umûr-ı mühim için iktizâ eden levâzımât-ı mezkûrenin vaktiyle tedârük ve tediyesinde azîm usrete dûçâr olmamıza bâdî hâlâta ictisâr etmekle mugāyir-i emr-i âlî hareketden men‘ olunmak matlûbumuzdur deyü mazmûn-ı münîfi bi’l-cümle takrîr-i meşrûhlarına mutâbık emr-i âlîşânı ibrâzıyla teşekkî eylediklerinde Yahûdi-i mersûm dahi cevâbında mazmûn-ı emr-i âlîşânı ba‘de’l-i‘tirâf beynleri tevfîk olundukda Yahûdi-i mersûm yedinde mevcûde olan dokuz aded derileri râyici üzere esnâf-ı mezkûreye bey‘ ve teslîm ve ba‘de’l-yevm emti‘a-i mahsûsalarına ta‘arruz etmeyip ber-mantûk-ı emr-i âlî harekete ta‘ahhüd eyledikde esnâf-ı mezkûre dahi râzı ve teşekkîlerinden herbiri fâriğ olup bu vechile kat‘-ı münâza‘a eyledikleri bi’[l]-iltimâs [huzûr-ı âlîlerine i‘lâm olundu.] Fî 23 R sene [1]221.