Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 831 Hüküm no: 1083 Orijinal metin no: [130b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Yusuf Beşe b. Abdullah’ın, Âişe bt. Ömer’den eşya bahasından alacaklı olduğu Mahmiye-i İstanbul’da Tülbentçi Hüsam mahallesinde sâkin el-Hâc Yusuf Beşe b. Abdullah nâm kimesne meclis-i şer‘-i şerîf-i lâzımü’t-teşrîfde işbu bâ‘isü’l-kitâb Âişe bt. Ömer nâm hâtun mahzarında üzerine da‘vâ ve takrîr-i kelâm edip mezbûre Âişe zimmetinde yedimden müşterâ ve makbûz beynimizde ilm-i şer‘î ile ma‘lûm cevâhir semeninden iki yüz elli beş esedî guruş ve bir çift zümrüd küpe bahâsından doksan esedî guruş cem‘an üç yüz kırk beş esedî guruş hakkım olup meblağ-ı mezbûrun iki yüz doksan beş esedî guruşunu mezbûre Âişe yedinden ahz u kabz edip bâkī zimmetinde elli esedî guruş hakkım vardır, mezbûreden suâl olunup alıverilmesi matlûbumdur dedikde, gıbbe’s-suâl mezbûre Âişe cevâbında fi’l-vâki‘ müdde‘î-i mezbûra eşyâ-i mezbûre semenlerinden vech-i muharrer üzre elli esedî guruş zimmetimde lâzımü’l-edâ ve vâcibü’l-kazâ deynim vardır deyû ikrâr etmeğin ikrârı mûcebince meblağ-ı bâkī elli esedî guruşu müdde‘î-i mezbûra edâya mezbûre Âişe’ye tenbîh olunup mâ vaka‘a bi’t-taleb ketb olundu. Fi’l-yevmi’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Yusuf Çavuş el-Mübâşir, Murad …? b. Ferhad?, Hoca Kasım b. Mehmed, İbrahim Ağa b. Sefer, Yusuf Bey b. Abdullah.