Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 178 Hüküm no: 205 Orijinal metin no: [19a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havyarcı Aci Vasil’in alacak verecek hususunda eski ortağı Aci İstavri’nin zimmetini ibra ettikten sonra tekrar hesabın görülmesi talebiyle açtığı davanın haklı olmadığı Havyarcı esnâfından Aci Vasil v. Aci Kılados zimmî Galata’da mahfil-i kazâda esnâf-ı merkūmeden Aci İstavri v. Yani zimmî muvâcehesinde fâide-i hâsılanın sülüsü benim ve sülüsânı mersûm Aci İstavri zimmînin olmak üzere bundan akdem ben mâlımdan beş yüz guruş ve mersûm Aci İstavri zimmî dahi mâlından bin guruş sermâye vaz‘ ve birbirine halt edip ve meblağ-ı mecmû‘-ı mahlût-ı merkūm bin beş yüz guruş ile havyar bey‘ u şirâsında bir müddet şerîk olup ba‘de fesh-i akd-i şirket-birle hesâbımızı mahzar-ı şuhûdda yegān yegān sahîhan rü’yet eylediğimizde altı yüz altmış üç guruş fâide-i hâsıla zuhûr edip meblağ-ı mezkûrdan benim sülüs hisseme isâbet eden iki yüz yirmi bir guruş ile asıl re’s-i mâlım olan beş yüz guruş ki cem‘an yedi yüz yirmi bir guruş şerîkim mersûm yedinden ahz u kabz edip re’s-i mâla ve ziyâde fâide-i hâsıla mütâlebesine ve bi’l-cümle husûs-ı mezkûra müte‘allika âmme da‘vâdan herbirimiz âharın zimmetini kabûlü hâvî ibrâ ve iskāt etmişidik lâkin câiz ki hesâbımızda galat vâki‘ olmuş ola mersûm ile tekrar hesâbımız rü’yet olunsun deyü tasaddî eylediği da‘vâsı takrîr-i meşrûh üzere ibrâ-yı mezkûru mukırr u mu‘terif iken mesmû‘a ve iltifâta şâyân olmadığı bi’l-iltimâs huzûr-ı âlîlerine i‘lâm olundu. Fî 13 R sene [1]221.