Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 181 Hüküm no: 211 Orijinal metin no: [19b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Abdurrahman’ın mehir, nafaka ve karzdan eski kocası Ebûbekir b. Ebûbekir’den ikrarı üzere otuz üç guruş alacağı olduğu Kasaba-i Kasımpaşa’da el-Hâc Ferhad Mahallesi’nde sâkine zâtı ta‘rîf-i şer‘î ile mu‘arrefe Rukiye bt. Abdurrahman Galata’da mahfil-i kazâda zevc-i sâbıkı Ebûbekir b. Ebûbekir muvâcehesinde mezbûr Ebûbekir on guruş mehr-i müeccel tesmiyesiyle zevc-i dâhilim olup târih-i i‘lâmdan on beş gün mukaddem beni tatlîk etmekle zimmetinde mütekarrir ve ma‘kūdun-aleyh mehr-i müeccel-i mezkûr ile nafaka-i iddet ve meûnet-i süknâm için bi’t-terâzî ta‘yîn olunan sekiz guruş ve cihet-i karzdan dahi elli guruş ki cem‘an altmış sekiz guruşu bana vermemekle hâlâ taleb ederim deyü da‘vâ eyledikde ol dahi cevâbında mehr-i müeccel-i mezkûr ile nafaka-i ma‘lûme-i müctemi‘a sekiz guruş ve cihet-i karzdan on beş guruş ki cem‘an otuz üç guruş zimmetinde deyni olduğunu ikrâr ve ziyâde müdde‘âsını ba‘de’l-inkâr müdde‘iye-i mezbûre ber-vech-i muharrer müdde‘âsı beyâna havâle olunup ikrârıyla lâzım gelen otuz üç guruşun müdde‘iye-i mezbûreye edâsıyla mezbûr Ebûbekir ilzâm olunduğu bi’l-iltimâs [huzûr-ı âlîlerine i‘lâm olundu.] Fî 28 R sene [1]221.