Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 832 Hüküm no: 1084 Orijinal metin no: [130b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Ömer’in, Nuri Çelebi b. Ali’deki eşya bahasından alacağını sulh yoluyla tahsil ettiği Medîne-i Hazret-i Ebî Eyyûb-i Ensârî mahallâtından Düğmeciler mahallesi sâkinelerinden Âişe bt. Ömer nâm hâtun meclis-i şer‘-i şerîf-i lâzımü’t-teşrîfde işbu bâ‘isü’l-kitâb Nuri Çelebi b. Ali nâm kimesne mahzarında ikrâr ve takrîr-i kelâm edip mezbûr Nuri Çelebi zimmetinde cihet-i karz-ı şer‘îden iki yüz esedî guruş ve beynimizde ma‘lûm bir dîbâ kaftan ve altmış zirâ‘ harîr-i alaca ve bir entari yelek alaca ve bir top çuka bürünceği ve gömlek bürüncek ve bir kılâbdanlı zenâne sarık ve bir kılâbdanlı çatkı ve on iki zirâ‘ beyaz ipek kenarlı bez ve bir entari yelek sandal ve on beş zirâ‘ beyaz dimi bahâlarından seksen beş esedî guruş cem‘an iki yüz seksen beş esedî guruş hakkım olup meblağ-ı mezbûr iki yüz seksen beş esedî guruşu mezbûr Nuri Çelebi’den taleb ve da‘vâ eylediğimde beynimizde münâza‘ât-ı kesîre vukū‘undan sonra muslihûn tavassut edip mezbûr Nuri Çelebi benimle yüz doksan esedî guruş üzerine an inkâr inşâ-i akd-i sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûr yüz doksan esedî guruşu mezbûr Nuri Çelebi yedinden tamâmen ahz u kabz eyledikden sonra meblağ-ı bâkī doksan beş esedî guruş da‘vâsından ve târih-i kitâba gelince beynimizde vâki‘ olan bey‘ ü şirâ ve ahz u i‘tâya müte‘allika cemî‘ de‘âvâdan mezbûr Nuri Çelebi’nin zimmetini ibrâ-i âm ile ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Es-Sâbikūn.